TIRANË- Skifter Tagani rezulton se është pronari i magazinës ku u gjetën 716 koli me ushqime të skaduara. Nga të dhënat e marra në Qendrën Kombëtare të Biznesit, rezulton se “Master AL”, zotërohet nga Tagani që furnizon një pjesë të mirë të dyqaneve me ushqime të përpunuara si biskota, molto, fruta të thata, etj.
Çfarë ndodhte në këtë magazinë?
Në momentin që produkteve u afronte data e skandencës, i tërhiqte nga tregu, u falsifikonte datat e skandencës dhe më pas i shpërndante sërish në dyqane.
Policia bën me dije se në pranga është vënë Florenc Domi, 38 vjeç, administrator i magazinës si dhe Agim Domi, 58 vjeç, magazinier.
Në total janë sekuestruar 716 koli me produkte ushqimore të përpunuara, të cilave u ishte kaluar afati i përdorimit që në muajin janar dhe shkurt 2025, por që u ishin vendosur data të reja skandece dhe po bëheshin gati për tu rihedhur në treg. Skifter Tagani rezulton të jetë edhe pronar i kompanisë ‘ANTER SHPK’, e cila prodhon biskota dhe çokollata./ZËRI/
