LIBRAZHD- Pas mbylljes së segmentit rrugor Librazhd-Prrenjas për shkak të shembjes së urës në vendin e njohur si “Arrat e Gurrës”, trafiku në këtë zonë është rënduar ndjeshëm. Mësohet se qindra automjete kanë mbetur të bllokuar për orë të tëra në trafik, pasi mbyllja e rrugës u njoftua me vonesë.
Për të shmangur vargun e gjatë të automjeteve, disa shoferë kanë vendosur të gjejnë vetë rrugë alternative. Devijimi më i përdorur nis nga qyteti i Librazhdit, përmes fshatit Spathar dhe më pas përgjatë rrugës Egnatia deri në fshatin Dardhë, për t’u kthyer më pas në segmentin kombëtar Hotolisht-Prrenjas.
Megjithatë, për shkak se shumë qytetarë kanë përdorur këtë segment rrugor, trafiku është rënduar edhe aty. Situata në akset që lidhin juglindjen e vendit paraqitet shumë e rënduar, dhe drejtuesit bëjnë thirrje për ndërhyrje urgjente nga autoritetet për zgjidhjen e kësaj situate. Ndërkohë, autoritetet këshillojnë shoferët të shmangin segmentin e bllokuar dhe të informohen paraprakisht për gjendjen e rrugëve. /ZËRI
