VLORË- Një ngjarje e rëndë ka ndodhur mesditën e kësaj të shtune në Vlorë, ku janë plagosur me thikë 3 të rinj, të cilët janë dërguar me urgjencë drejt spitalit. Burime bëjnë me dije për ZËRIN se dy personat e plagosur janë Xhuliano Hodaj dhe Enea Tafili, dhe personi i tretë me inicialet H.N. Policia ka arrestuar njërin prej autorëve të plagosjes së trefishtë, ndërsa deklaron se po punohet për kapjen e autorit tjetër.
Në vijim të veprimeve procedurale, gjatë kontrollit në banesën e personit të arrestuar, shërbimet e Policisë gjetën dhe sekuestruan 1 pistoletë sportive, 2 përforcues grushti dhe 2 mjete prerëse (thika).
Njoftimi i policisë:
Plagosën me mjet prerës (thikë), 3 bashkëmoshtarët e tyre, falë ndërhyrjes së menjëhershme të Policisë, vihet në pranga njëri prej autorëve të dyshuar, punohet për kapjen e autorit tjetër të dyshuar.
Sekuestrohen 1 pistoletë sportive, 2 mjete prerëse (thika) dhe 2 përforcues grushti.
Rreth orës 12:30, në lagjen “Isa Boletini”, dyshohet se pas një konflikti për motive të dobëta, kanë mbetur të dëmtuar me mjet prerës (thikë), shtetasit Xh. H., 20 vjeç, E. T., 18 vjeç dhe H. N., 18 vjeç, të cilët ndodhen në spital, në kujdesin e mjekëve.
Shërbimet e Policisë kanë shkuar menjëherë në vendngjarje dhe falë veprimeve të shpejta, bënë të mundur kapjen e njërit prej autorëve të dyshuar, shtetasit H. M., 18 vjeç, dhe shoqërimin e tij, në Komisariatin e Vlorës, për veprime të mëtejshme procedurale.
Në vijim të veprimeve procedurale, gjatë kontrollit në banesën e shtetasit H. M., shërbimet e Policisë gjetën dhe sekuestruan 1 pistoletë sportive, 2 përforcues grushti dhe 2 mjete prerëse (thika).
Vijon puna për kapjen e autorit tjetër të përfshirë në këtë konflikt, shtetasit J. R.
Ndërkohë, vijon puna e grupit hetimor, për sqarimin e plotë të rrethanave të ngjarjes
/ZËRI
