EKUADOR – Presidenti i Ekuadorit Daniel Noboa shpalli të hënën një gjendje të jashtëzakonshme për kombin e Amerikës së Jugut pasi një udhëheqës famëkeq bande u arratis nga burgu, duke rritur frikën e sigurisë, ndërsa autoritetet luftojnë për të kontrolluar gjakderdhjen, pas një lufte të përgjakshme me bandat kriminale.
José Adolfo Macías Villamar, udhëheqësi i kartelit të frikshëm të drogës Los Choneros i njohur më mirë me pseudonimin e tij "Fito", u arratis nga burgu në qytetin bregdetar të Guayaquil të dielën, sipas autoriteteve. Më shumë se 3,000 oficerë policie dhe anëtarë të forcave të armatosura janë vendosur për ta kërkuar atë, tha qeveria.
Gjendja e jashtëzakonshme do të zgjasë për 60 ditë dhe vendos një shtetrrethim nate nga ora 23:00 deri në orën 5 të mëngjesit, tha Noboa të hënën, duke shtuar se u jep forcave të sigurisë të gjithë mbështetjen politike dhe ligjore për veprimet e tyre.
"Koha ka mbaruar kur të dënuarit e trafikut të drogës, vrasësit dhe krimi i organizuar i diktojnë qeverisë se çfarë të bëjë", tha Noboa në një njoftim me video. Ai nuk e përmendi arratisjen e Fitos. Noboa, djali i një manjati bananesh, u bë president në nëntor pas zgjedhjeve të nxitura nga shqetësimet për rritjen e dhunës dhe përkeqësimin e situatës së sigurisë në vendin e Amerikës Latine, vetëm disa muaj pas vrasjes së një kandidati tjetër presidencial, Fernando Villavicencio.
Të hënën, Noboa tha se kishte autorizuar forcat e sigurisë për të rimarrë kontrollin e sistemit të trazuar të burgjeve të Ekuadorit, i cili ra në kolaps. Ekuadori, shtëpia e ishujve Galapagos dhe një ekonomi ku paraja zyrtare është dollari, miqësore për turistët, dikur njihej si një "ishull paqeje", i vendosur midis dy prej prodhuesve më të mëdhenj të kokainës në botë, Perusë dhe Kolumbisë. Por portet e thella të Ekuadorit e kanë bërë atë një pikë kyçe tranziti për kokainën, duke gjetur rrugën drejt konsumatorëve në Shtetet e Bashkuara dhe Evropë. Dhe ekonomia e saj me dollar e bën atë një vend strategjik për trafikantët që kërkojnë të pastrojnë para.
Fito u dënua në vitin 2011 me 34 vjet burg për krime, duke përfshirë trafikun e drogës dhe vrasjen, sipas Reuters. Analistët i thanë më parë CNN se bandat ekuadoriane si Choneros po punonin me organizata kriminale të huaja, duke përfshirë kartelet meksikane, bandat urbane braziliane, madje edhe qelizat mafioze shqiptare, duke nxitur konfliktin e vazhdueshëm në vend.
Autoritetet akuzojnë Choneros për kontrollin e burgjeve kryesore të Ekuadorit, të cilat kanë qenë prej kohësh ‘teatri’ kryesor i dhunës në vend. Forcat e sigurisë kanë luftuar për t'u përballur me bandat brenda burgjeve të mbipopulluara, ku të burgosurit shpesh marrin kontrollin e burgjeve dhe drejtojnë rrjetet kriminale nga prapa hekurave, sipas autoriteteve. Pas arratisjes së Fitos, agjencia e burgjeve të Ekuadorit të dielën raportoi incidente në të paktën gjashtë burgje në provinca të ndryshme./ZËRI/
