KUKËS- Prokuroria e Kukësit ka kërkuar pezullimin nga detyra një efektiv të Policisë së Shtetit. Punonjësi i Policisë, i identifikuar me inicialet K.K., akuzohet për "shpërdorim detyre". Siç edhe bëhet me dije zyrtarisht, Agjencia e Mbikëqyrjes Policore (AMP), duke u bazuar në vëzhgimet ambientale, por edhe në bisedat telefonike ka dalë në përfundimit se polici favorizonte disa persona që i njihte. Këtyre personave, i njoftonte që të mos gjobiteshin dhe të kalonin pa u kontrolluar nga Policia. Kështu, me kërkesën e Prokurorisë, Gjykata vendosi pezullimin e tij nga detyra, por hetimet vazhdojnë për kolegët e tij të qarkullimit rrugor.
FAVORIZOI PERSONA TË NDRYSHËM DUKE MOS I GJOBITUR APO KONTROLLUAR, PROKURORIA E KUKËSIT KËRKON PEZULLIMIN E PUNONJËSIT TË POLICISË
Prokuroria Pranë Gjykatës së Shkallës së Parë të Juridiksionit të Përgjithshëm Kukës, kërkon masën e sigurisë të ‘Pezullimit të ushtrimit të një detyre a shërbimi publik’ për shtetasin K.K., punonjës policie për Veprën Penale ‘Shpërdorim Detyre’ parashikuar nga neni 248 i Kodit Penal. Në kuadër të hetimeve lidhur me procedimin penal nr.78 të vitit 2024 në bashkëpunim me Agjencinë e Mnikëqyrjes Policore (AMP) nga vëzhgimet ambientale dhe inerceptimet telefonike krijohet dyshimi i arsyseshëm që punonjësi i policisë K. K. duke shfrytëzuar dhe përfituar nga pozicioni i tij me detyrë trup shërbimi trafiku urban dhe Interurban, DVP –Kukës, favorizonte persona që njeh me qëllim që të mos gjobiten apo të kalojnë pa u kontrolluar nga policia. Me kërkesën e Prokurorisë, Gjykata vendosi pezullimin nga detyra, ndërsa vijojnë hetimet edhe për punonjës të tjerë të qarkullimit rrugor./ZËRI
