TIRANË- Ministri i Brendshëm Balla ka miratuar këtë të hënë urdhrin e posaçëm ku të gjithë efektivët e Policisë së Shtetit, Gardës së Republikës dhee Agjensisë së Mbikqyerjes Policore do të vetëdeklarojnë nëse kanë përdorur aplikacionet SKY ECC apo Encro Chat. Formulari i Vetëdeklarimit po u shpërndahet për plotësim, strukturave të mësipërme dhe do të shërbejë si bazë për nisjen e verifikimeve.
Çdo punonjës që do të rezultojë se ka përdorur këto aplikacione, do të përjashtohet menjëherë, përfundimisht, nga Policia e Shtetit, Agjencia e Mbikëqyrjes Policore, apo Garda e Republikës.
Kjo lëvzije vjen pas zbërthimit të mesazheve të koduara në aplikacionet SKY, u arrestuan disa drejtues të lartë policie, të cilët bashkëpunonin me krimin e organizuar. Në mesin e policëve që janë vënë në pranga në kuadër të përgjimeve që u bënë publike në dosjen Metamorfoza 1 dhe 2 janë Dedan Gjoni, Oltion Bistri apo Dritan Metaj. Ndërkohë që në përgjime përmendej dhe emri i Ardi Veliut, i cili dha dorëheqjen nga kreu i AMP-së, me pretendimin se do të merrte një tjetër detyrë shtetërore, e cila nuk është bërë publike deri tani./ZËRI
