TIRANË- Zbardhen detaje nga seanca gjyqësore npër çështjen “Gërdeci” në Gjykatën e Posaçme Kundër Korrupsionit dhe Krimit të Organizuar. Ai që ka dëshmuar këtë të mërkurë ka qenë ish-drejtori Juridik i Ministrisë së Mbrojtjes, Rezart Tërshana. Ky i fundit ka folur për procesin e demontimit, ndërsa iu përgjigj disa pyetjeve nga ish-ministri i Mbrojtjes Fatmir Mediu dhe avokati i tij. Ndërkohë në seancë ka ndërhyrë dhe Zamira Durda, nëna e një prej viktimave të shpërthimit, e cila ka akuzuar Mediun. Ndërkohë seanca e radhës është vendosur të mbahet më 15 mars.
Rezart Tërshana: Ne nuk caktuam çmim për demontimin, sepse nuk e dinim ku do bëhej demontimi. Komisioni i çmimeve nuk e dinte këtë gjë, kjo gjë nuk u diskutua, për sa kohë nuk e dinim ku do transportoheshin nuk vendosnim dot çmim. Me aq sa mbaj mend unë, 30 deri në 35 milionë euro harxhoheshin nga buxheti i shtetit për demontimin.
Fatmir Mediu: Çfarë raportesh ke patur me mua?
Rezart Tershana: Marrëdhënie pune, asgjë tjetër
Fatmir Mediu: Çështje fitimi ka qenë demontimi?
Rezart Tërshana: Jo, ka qenë çështje sigurie
Fatmir Mediu: E mbani mend urdhërin 2044?
Rezart Tërshana: Jo
Fatmira Durda: Lërini urdhërat 2044, po flisni për pasojat e Gërdecit (me tone të larta)
Avokati Visha pyet Tërshanën: Cili nga ministrat ka qenë më korrekti sipas jush?
Rezart Tërshana: Mediu është njëshi
Zamira Durda: Njëshi është se ka vrarë njerëz
Gjyqtarja Irena Gjoka: Mbani qetësi
Fatmir Mediu akuzohet për shpërdorim detyre të kryer në bashkëpunim me zinxhirin komandues ushtarak. Ish-ministri u rikthye në Gjykatë nga denoncimi i një familjeje nga Gërdeci, fshati i tragjedisë së 15 marsit ku nga shpërthimi humbën jetë 26 persona e u plagosën 300 të tjerë./ZËRI
