GREQI- Një provë e re është zbuluar lidhur me të ashtuquajturën "mafia e ndërtimit" në Mykonos. Prova ka 1 vit e gjysmë që ka mbetur e paprekur nga Policia Helenike. Sipas informacioneve të medias greke, "datajournalists", bëhet fjalë për një bisedë pesë-orëshe mes Alfons Doçit, i cili u vra në burgun e Korydallosit dhe një "kryekontraktori" nga Mykonisi, të cilin e kishte denoncuar si porositësin për vrasjen e një agjenti të njohur të pasurive të paluajtshme po nga ishulli. Porosia për të vrarë ishte marrë nga vetë Doçi.
Biseda në fjalë është regjistruar fshehurazi nga Doçi, i cili më pas e kishte dorëzuar audion në Policinë Helenike që në qershor 2023, pasi ishte arrestuar në qendër të Athinës. Ky përgjim më pas i është Drejtorisë së Hetimeve Kriminale të Policisë Helenike për përpunimin dhe transkriptimin e bisedave. Megjithatë, deri më sot nuk dihet se çfarë ka ndodhur me këtë provë, e cila dyshohet se përmban informacione të vlefshme në lidhje me aktivitetet e grupeve kriminale në Mykonos.
Vrasja në burgun e Korydallos
Në fund të qershorit 2024, Alfons Doçi, me origjinë shqiptare, u vra brenda burgut të Korydallos. Doçi është një person i njohur për autoritetet me një të kaluar kriminale. Më 12 mars 2015, Doçi kishte vrarë me gjakftohtësi një 53-vjeçar pronar të një dyqani në Elefsinë, ndërsa kishte grabitur edhe gruan e viktimës. Më 6 tetor 2015, gjatë një grabitjeje në një shtëpi në Aspropirgos, një 75-vjeçare u godit në kokë, e cila ndërroi jetë pak ditë më vonë. Më 30 mars 2016 u zbërthye banda ku ai bënte pjesë, e cila përveç dy vrasjeve, autoritetet dolën në përfundimin se grupi kishte kryer të paktën 5 grabitje në banesa.
Më 9 maj 2018, 35-vjeçari arriti të arratisej gjatë transferimit të tij për në burgun e Kretës, së bashku me tre të burgosur të tjerë. Një prej tyre ishte njeriu që e vrau në burgun e Korydallos. Nga hetimet e Policisë rezulton se sherri në Korydallos ka nisur për një arsye të parëndësishme. Gjithçka ndodhi kur oficerët e burgut i thirrën të burgosurit në qelitë e tyre. Mirëpo, disa prej tyre reaguan ashpër për shkak të vapës. Sherri nisi me fjalë dhe më pas, përfundoi në përleshje fizike. Dy të burgosur iu afruan 35-vjeçarit Doci dhe filluan ta rrahin. Më pas, njëri prej tyre nisi ta godiste me thikë, duke i marrë jetën 35-vjeçarit. Vdekja e tij ndodhi vetëm një javë para vrasjes gjakftohtë të inxhinierit topograf 54-vjeçar Panagiotis Stathis në Psychiko.
Vrasja e topografit solli edhe një herë në sipërfaqe çështjen e nxehtë të 'mafies së ndërtimit në Mykonos', e cila vazhdon të veprojë e pakontrolluar. Tashmë është arrestuar autori i dyshuar i kësaj vrasjeje, por jo porositësi, pra personi që ka dhënë urdhër për vrasjen.
Doçi dhe kontraktori i madh i Mykonos
Vitet e fundit para vrasjes së tij, Doçi jetonte në Mykonos, ku edhe kishte nisur punë në ndërtim. Sipas asaj që shkruajnë mediat greke, shqiptari ishte i lidhur me një kontraktor të madh, i cili në të kaluarën ishte përfshirë edhe në një rast vrasjeje, për të cilën më pas u shpall i pafajshëm, ndërsa kufoma nuk u gjet kurrë. Por nuk e zbulojnë identitetin e personit në fjalë. Kështu flitet se ka nisur konflikti. Në nëntor 2022, Doçi u përfshi në një rast grabitjeje dhe sulmi ndaj kontraktorit, së bashku me dy bashkatdhetarë të tjerë. Shqiptarët hynë në zyrën e kontraktorit dhe filluan ta rrahin. Mirëpo, njëri prej tyre harroi armën që kishte me vete në tavolinën e kontraktorit. Ky i fundit, sapo gjeti rastin, rrëmbeu armën dhe filloi t'i kërcënonte. Grabitësit u larguan, por jo pa marrë 30 mijë euro me vete. Në qershor 2023, autorët u arrestuan në qendër të Athinës. Mes tyre ishte edhe Alfons Doçi.
Audioja që injorohet edhe sot
Pas arrestimit, Doçi është transferuar në Departamentin e Armëve të Policisë Helenike. Aty, sipas informacioneve të Gazetarëve të të Dhënave, ai ka njoftuar Policinë se posedonte një dokument audio. Audioja dyshohet se përmbante, sipas të njëjtave burime, referenca për persona të veçantë dhe veprime të lidhura me mafian e ndërtimit në Mykonos.
Audioja i është përcjellë Drejtorisë së Hetimeve Kriminale të Policisë Helenike (EL.AS) për përpunim dhe transkriptim të bisedave. Megjithatë, deri më sot fati i atij objekti ende nuk dihet. sipas informacioneve të Gazetarëve të të Dhënave, audio nuk i është përcjellë Departamentit të Krimeve Kundër Jetës, i cili kishte marrë përsipër hetimet si për vrasjen e Doçit dhe të inxhinerit topograf. Nuk dihet pse.
Ekzistenca e audios është përmendur nga vetë Doci gjatë gjyqit në Syros në mars 2024, ku akuzohej për sulmin dhe grabitjen ndaj kontraktorit të Mykonos. Ishte një gjyq që i ngjante një fortese nga frika e incidenteve mes dy palëve.
Procedurat u monitoruan personalisht nga kreu i Prokurorisë së Apelit të Rajonit Egje. Prokurori i Apelit me përvojë kishte urdhëruar praninë e forcave policore me asistencën edhe të efektivëve të Policisë "EKAM" nga Athina.
Kontrata ndaj një ndërmjetësi dhe denoncimi ndaj Doçit
Doçi kishte denoncuar edhe diçka tjetër pranë autoriteteve. Ekzistenca e një kontrate vdekjeje ndaj një agjenti të njohur imobiliar në Mykonos, me urdhër të kontraktorit të cilin ai e kishte regjistruar fshehurazi. Ngjarja ka ndodhur në vitin 2020. Agjenti imobiliar është sulmuar jashtë shtëpisë së tij. Një burrë i kishte ngritur një pritë, teksa mbante në dorë një shufër hekuri. Kur u shfaq ndërmjetësi, ai filloi ta godiste në krahë dhe këmbë, duke i shkaktuar fraktura të rënda. Ndërmjetësi foli publikisht për atë që kishte ndodhur.
Sipas raportimeve, ka pasur mbi 100 raste abuzimi në vila, hotele dhe dyqane në të cilat dyshohet se janë përfshirë emra të rëndësishëm në ishull. Ndërmjetësi kishte bërë ankesa me shkrim si në organet kompetente, ashtu edhe në rrjetet sociale.
Autori i sulmit ishte Alfons Doçi, pasi e pranoi vetë para autoriteteve 2 vite më vonë. Sipas asaj që ai kishte dëshmuar, sulmi është kryer me urdhër të dhënë nga kontraktori i Mykonos me të cilin ai bashkëpunonte në atë kohë. Ndaj Doçit u ngrit një procedim penal për tentativë vrasje ndaj ndërmjetësit, ndërsa zhvilluesi i Mykonos u procedua penalisht për nxitje të vrasjes së mbetur në tentativë. Dy burrat ishin planifikuar të dilnin në gjyq në Naxos më 14 qershor 2024, megjithatë, pas një kërkese nga pala e Doçit, seanca u shty. Ky gjyq tani ka rifilluar. Në fakt, në një seancë dëgjimore të fundit, pala e ndërmjetësit thuhet se argumentoi për ekzistencën e një regjistrimi të dytë audio në të cilin ishte regjistruar edhe një tjetër kontraktor.
Gjatë hetimeve për vrasjen e Doçit nga organet e hetuesisë, u bë një kërkesë për hapjen e celularëve të autorëve për të parë se me kë kishin folur para dhe pas vrasjes. Qëllimi ishte të shihej nëse vrasja e Doçit ishte një ngjarje e rastësishme apo ishte një vrasje e urdhëruar nga një person ndoshta i lidhur me mafian e Mykonos. Megjithatë, kërkesa nuk u pranua.
Telefonat nuk u ndezën kurrë./ZËRI
Marrë dhe përkthyer nga datajournalists.co.uk
