TIRANË- Ministri i Brendshëm Taulant Balla ka bërë me dije këtë të enjte shkrirjen e strukturës së Forcave të Ndërhyrjes së Shpejtë (FNSH). Tashmë do të krijohet një strukturë e re brenda Policisë së Shtetit, e cila do të quhet "Forca Kombëtare e Sigurisë Publike".
Deklaratën ministri e bëri i ftuar në "Real Story". Sipas Ballës, kjo strukturë e re do të jetë në drejtimin e drejtëpërdrejtë të Drejtoreit të Përgjithshëm të PSH. Por kreu i Ministrisë së Brendshme tha se brenda kësaj strukture do futen dhe struktura të reja ku përjashtohen ato RENEA. Kjo strukturë sipas Ballës do qëndrojë siç është.
Taulant Balla: Prej vitesh është folur, janë harxhuar para, konferenca, diskutime, për policimin në komunitet, por e vërteta është që tashmë kjo qasje do të ketë një forcë tjetër. Dua ta ndaj me publikun, krijimin e një force të re që quhet Forca Kombëtare e Sigurisë Publike. Kjo do të jetë një strukturë e re brenda policisë së Shtetit. Forca Kombëtare e Sigurisë do të jetë një forcë, në drejtimin e drejtpërdrejtë të drejtorit të Përgjithshëm të policisë së Shtetit, që shkon dhe merr përsipër operacionet vendosjen e sigurisë publike, shtimin e forcave sa i përket ngjarjeve të mëdha. Si në rastin e Samitit, që u përballua me shumë sukses./Zëri.ai
