Avokati i Popullit ka nisur verifikimin e rrethanave të transferimit të kryebashkiakut të Tiranës Erion Veliaj nga burgu i Durrësit në atë të Fierit. Përfaqësues të institucionit kanë shkuar në IEVP Fier për të inspektuar ligjshmërinë e kësaj procedure dhe kushtet në të cilat Veliaj po mbahet pas zhvendosjes.
Inspektimi vjen pas transferimit të tij më 28 tetor, ndërsa vëmendja është përqendruar edhe te mënyra e izolimit në qelinë ku po qëndron. Avokati i Veliajt Plarent Ndreca ka pretenduar se kryebashkiaku mbahet në një qeli pa dritare dhe nën mbikëqyrje të plotë.
Verifikimi i Avokatit të Popullit pritet të hedhë dritë mbi procedurën e ndjekur për transferimin dhe respektimin e të drejtave të Veliajt gjatë qëndrimit në institucionin e vuajtjes së dënimit./ZËRI
