SHBA- Gjykata Federale në SHBA ka urdhëruar rikthimin në punë të stafit të Zërit të Amerikës (VOA) dhe rifillimin e transmetimeve ndërkombëtare, pas një viti reduktimesh drastike. BBC raporton se një gjyqtar në SHBA ka vendosur që mbyllja efektive e Zërit të Amerikës (VOA) vitin e kaluar ishte "e paligjshme" dhe se qindra gazetarë të saj duhet të rikthehen në punë.
Gjyqtari i Gjykatës së Qarkut, Royce Lamberth, u ka dhënë autoriteteve një javë kohë për ta rikthyer në transmetim transmetuesin ndërkombëtar.
Presidenti Trump emëroi Kari Lake në krye të Agjencisë Amerikane për Median Globale (USAGM) - kompania mëmë që mbikëqyr dhe financon Zërin e Amerikës, si dhe Radion Evropa e Lirë dhe Radion Azia e Lirë. Lake vazhdoi të shkarkonte më shumë se 85% të punonjësve të agjencisë - më shumë se 1,000 punonjës vetëm në Zërin e Amerikës - duke lënë vetëm një grusht punonjësish në vendet e tyre të punës.
Një javë më parë, gjykata kishte vendosur gjithashtu se drejtimi i agjencisë nga Kari Lake ishte i paligjshëm.
Zëri i Amerikës u krijua pas Luftës së Dytë Botërore si një nga instrumentet kryesore të SHBA për informimin ndërkombëtar. Pas marrjes së presidencës për herë të dytë, Trump e sulmoi median me pretendimin se po pengon dhe po sulmon qeverinë e tij./ZËRI
