TIRANË- 45-vjeçari shqiptar, Dhimitër Meçi (Demo), është arrestuar në Greqi si pjesë e një grupi vrasësish me pagesë. Ndërkohë, policia shqiptare ka ushtruar kontroll në banesën e prindërve të 45-vjeçarit në Gjirokastër, Shqipëri, ku është gjetur vetëm nëna e tij 84-vjeçare.
Një arsenal i tërë u zbulua në shtëpinë e “Demos” në Shqipëri, pas një operacioni përkatës policor, i cili është i përfshirë në tentativën e vrasjes së Giannis Lalas, në Ano Liosia. Ndërkohë, për herë të parë kanë reaguar edhe autoritetet shqiptare.
Policia e Shetit bën me dije se gjatë një operacioni në bashkëpunim me autoritetet greke janë sekuestruar në total 3 armë zjarri automatike, 200 fishekë kallashnikovi, 18 pako me fishekë pistolete dhe 5 krehra. Ndërkohë, në banesën e 45-vjeçarit shqiptar në Gjirokastër, janë sekuestruar 2 kallashnikovë dhe një armë zjarri automatike, të dyshuar të trafikuar dhe qindra fishekë të kalibrave të ndryshëm, të cilat do të dërgohen tek Instituti i Policisë Shkencore për ekspertim teknik.
Njoftimi:
Policia e Shtetit Finalizohet operacioni policor i koduar "Provat".
Bashkëpunimi mes Policisë së Shtetit dhe Policisë Greke çoi në zbulimin dhe sekuestrimin të një arsenali armësh zjarri dhe municioni luftarak.
Sekuestrohen 3 armë zjarri automatike, 200 fishekë kallashnikovi, 18 pako me fishekë pistolete dhe 5 krehra.
Armët dhe municioni luftarak u gjetën në një nga banesat e një prej të arrestuarve në Greqi, të dyshuar si vrasës me pagesë.
Në kuadër të bashkëpunimit mes Policisë shqiptare dhe Policisë greke, pas shkëmbimit të informacionit për kapjen e disa shtetasve shqiptarë në Greqi, të dyshuar si vrasës me pagesë, strukturat e Policisë së Shtetit në Gjirokastër, Vlorë dhe Lezhë, në kuadër të operacionit policor të koduar "Provat", zhvilluan kontrolle në banesat e këtyre shtetasve.
Si rezultat i kontrollit në fshatin Labovë e Kryqit, shërbimet e Drejtorisë Vendore të Policisë Gjirokastër gjetën të fshehura, në banesën e shtetasit Dh. M., 45 vjeç, 2 kallashnikovë dhe një armë zjarri automatike, të dyshuar të trafikuar dhe qindra fishekë të kalibrave të ndryshëm.
Armët e zjarrit, që u gjetën në banesën e 45-vjeçarit, i ndaluar 2 ditë më parë në Greqi, mbi akuza për vrasje dhe pjesëmarrje në grup kriminal që posedonte armë zjarri, do të dërgohen tek Instituti i Policisë Shkencore për ekspertim teknik.
Me qëllim dokumentimin e plotë të veprimtarisë kriminale të shtetasve shqiptarë Dh. M., 45 vjeç, banues në Labovën e Kryqit Gjirokastër; A. B., 32 vjeç, banues në Kudhës Himarë; F. P., 39 vjeç, banues në Lezhë; dhe P. Th., 31 vjeç, banues në Muzinë Sarandë, të dyshuar si vrasës me pagesë, strukturat e Departamentit të Policisë Kriminale, ato të DVP Gjirokastër, Vlorë e Lezhë, në bashkëpunim me Prokurorinë, po vijojnë hetimet e thelluara duke koordinuar dhe bashkëpunuar ngushtësisht me homologët grekë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme, për veprat penale “Trafikimi i armëve dhe i municionit” dhe “Mbajtja pa leje dhe prodhimi i armëve, armëve shpërthyese dhe i municionit”.
Burime bëjnë me dije se policia greke dyshon se grupi prej 4 shqiptarësh e 4 grekësh, ishte përgatitur për kryerjen e një atentati ndaj një mafiozi grek në Pirea, ndoshta rreth Krishtlindjeve, ish bashkëpunëtor i Mihali Zampounit, i ekzekutuar më parë në atentat. Dyshohet se ata e kishin ndjekur viktimën e radhës dhe po planifikonin goditjen, ndoshta me një nga armët e gjetura në një apartament në Marina Zeas të Greqisë.
"Demos", një nga kriminelët më mizorë dhe të rrezikshëm të mafies greke, u arrestua pas një hetimi disamujor dhe dyshohet se mori përsipër edhe ekzekutimin e Giannis Lalas majin e kaluar në Ano Liosia. Megjithatë, ai iku sepse udhëtonte me një makinë të blinduar. Sigurisht, ai nuk pati të njëjtin fat në Araçovë, ku u vra në një hotel ku po qëndronte.
Siç raportohet në media, kohët e fundit, 45-vjeçari ishte fshehur në dyqanin e armëve në Kallithea, ku autoritetet gjetën armë të rënda, drogë dhe pajisje mbikëqyrjeje që dëshmojnë për aktivitetet e organizuara të grupit.
Operacioni i Policisë
Mëngjesin e 9 dhjetorit 2025, Drejtoria e Krimit të Organizuar, me pjesëmarrjen e Departamenteve të Zhvatjes, Krimit të Organizuar të Kretës dhe Prokurorisë së Krimeve të Trikalës, kreu një operacion të koordinuar. Pesë persona u arrestuan, ndërsa tre të tjerë u identifikuan , përfshirë një të burgosur në një Qendër Paraburgimi.
Çështja penale e ngritur përfshin akuza për: Organizatë kriminale; Vrasje në tentativë; Zjarrvënie; Vjedhje; Falsifikim
Droga; Posedimi dhe përdorimi i dallueshëm i armëve; Dhuna ndaj punonjësve.
Mësohet se mes të arrestuarve janë edhe disa shqiptarë: Dhimitër Meci alias Dimitrios Metsis, 45 vjec nga Labova e Poshtme e Gjirokastrës, Andrea Brokeri, 32 vjec nga Himara dhe Fatjon Prendi alias Fatjion Prendi, 39 vjeç nga Lezha, ndërsa një shqiptar i katërt është shpallur në kërkim.
Një grup i organizuar mirë me vrasës me pagesë u shpërbë nga autoritetet të martën në mëngjes, më 12 shtator, në një operacion të kryer në Atikë. Grupi dyshohet se qëndron pas tentativës së vrasjes së Giannis Lalas që ndodhi në Ano Liosia pranverën e kaluar, disa muaj para vrasjes së tij me gjakftohtësi. Bëhet fjalë për gjashtë persona, dy grekë dhe katër shqiptarë. Katër prej të arrestuarve konsiderohen vrasësit kryesorë të grupit, me një rol aktiv në tentativën e vrasjes./ZËRI
