MOSKË- Julia Navalny, e veja e liderit të opozitës ruse Alexei Navalny, i cili vdiq në burg në Rusi më 16 shkurt, u bëri thirrje sot politikanëve dhe zyrtarëve evropianë që të hetojnë flukset financiare të Perëndimit, të cilat dyshohet se kanë lidhje me presidentin rus Vladimir Putin dhe aleatët e tij. Navalny foli në Parlamentin Evropian në Strasburg, 12 ditë pasi burri i saj vdiq papritur teksa ndodhej në burg.
Ajo tha se burri i saj frymëzoi njerëzit pavarësisht kufizimeve që Putini i kishte vendosur gjatë jetës së tij, por shtoi se Putini nuk mund të dëmtohet nga sanksionet apo rezolutat, as në bazë të moralit dhe rregullave.
"Nëse vërtet dëshironi të mposhtni Putinin, duhet të bëheni novatorë. Duhet të ndaloni së qeni i mërzitshëm. Ju nuk mund ta dëmtoni Putinin me një rezolutë tjetër ose një grup tjetër sanksionesh që nuk janë të ndryshme nga ato të mëparshmet. Nuk mund ta mposhtni duke menduar se ai është një njeri me parime që ka moral dhe rregulla,"-tha ajo para Parlamentit të BE-së.
Gjithashtu, ajo e cilësoi regjimin e Putin si një “grup kriminal” dhe tha se kyç duhet të jenë hetimet financiare në vend të metodave diplomatike.
Aleksei Navalny vdiq në burg më 16 shkurt, dhe Shërbimi Federal i Ndëshkimit për Distriktin Yamalo-Nenets, ku ai ishte i burgosur, deklaroi se Navalny u ndje mirë pas një shëtitje në mëngjes dhe humbi vetëdijen. Navalny ishte dënuar me 30 vite burg pasi njihej si një kritik i ashpër i Kremlinit./ZËRI
