FRANCË- Qeveria e pakicës në Francë mund të rrëzohet muajin e ardhshëm, pasi tre partitë kryesore të opozitës thanë se nuk do ta mbështesin një mocion besimi që kryeministri Francois Bayrou e njoftoi për 8 shtator, lidhur me planet e tij për shkurtime të gjera buxhetore.
Tubimi Kombëtar i ekstremit të djathtë dhe të Gjelbrit thanë se do të votonin kundër tij. Socialistët, nga vota e të cilëve varet kryesisht fati i Bayrou-t, thanë se nuk e shihnin se si mund ta mbështesnin atë - përveç nëse ai ndryshonte qasje ndaj buxhetit, gjë që nuk e shihnin si të mundshme të ndodhte.
Nëse ai humbet votëbesimin në Asamblenë Kombëtare, qeveria e Bayrou-t do të bjerë.
Pasiguria i trembi investitorët, duke e çuar primin e rrezikut për obligacionet franceze mbi ekuivalentët e tyre gjermanë deri në 5 pikë bazë në nivelin e tyre më të lartë që nga mesi i qershorit. Indeksi CAC-40 i aksioneve kryesore franceze e mbylli ditën me një rënie prej 1.6%.
Nëse qeveria bie, Presidenti Emmanuel Macron mund të emërojë menjëherë një kryeministër të ri ose t'i kërkojë Bayrou-t të qëndrojë si kreu i një qeverie të përkohshme, ose mund të thërrasë zgjedhje të parakohshme.
Macron humbi kryeministrin e tij të fundit, Michel Barnier, në një votë mosbesimi mbi buxhetin në fund të vitit 2024, pas vetëm tre muajsh në detyrë pas zgjedhjeve të tjera të parakohshme në korrik të atij viti.
Bayrou pranoi se kërkimi i besimit të një parlamenti shumë të fragmentuar ishte një bast i rrezikshëm.
«Po, është e rrezikshme, por është edhe më e rrezikshme të mos bësh asgjë», tha ai në një konferencë për shtyp, duke iu referuar asaj që ai e quajti rreziku kryesor me të cilin përballej vendi për shkak të borxhit të madh.
Vota e besimit, tha ai, do të vlerësonte nëse ai kishte mbështetje të mjaftueshme në parlament për buxhetin e tij të shtrënguar prej 44 miliardë eurosh (51.51 miliardë dollarë), ndërsa përpiqet të zbusë një deficit që arriti në 5.8% të produktit të brendshëm bruto vitin e kaluar, pothuajse dyfishi i limitit zyrtar të BE-së prej 3%.
Edhe nëse qeveria fiton votëbesimin, kjo do të thotë vetëm se ai ka mbështetje për pikëpamjet e tij mbi problemet fiskale të Francës , me një votim për vetë buxhetin që pritet të mbahet më vonë gjatë vitit.
Bayrou ka propozuar heqjen e dy festave zyrtare dhe ngrirjen e shpenzimeve për mirëqenie dhe kategorive tatimore në vitin 2026 në nivelet e vitit 2025, pa i përshtatur ato për inflacionin. Ai tha se propozimi i tij për të hequr festat zyrtare mund të ndryshohet./ZËRI
