BRITANI E MADHE- Spiunja më jetëgjatë e Britanisë në Luftën e Dytë Botërore, Christina Grenville, rrezikoi jetën e saj duke kryer misione në të gjithë Evropën, por sot dihet shumë pak për kontributin e saj. Kush ishte ajo dhe pse Britania e Madhe i detyrohet kaq shumë?
Më 15 qershor 1952, Grenville u kthye në hotelin perëndimor të Londrës pasi fluturimi i saj për në Belgjikë u anulua. Kur arriti në dhomën e saj të zakonshme në katin e parë, dëgjoi një burrë në sallë duke thirrur emrin e saj. Në katin e poshtëm, ajo u gjend ballë për ballë me ish të dashurin e saj, i cili papritur i futi një thikë në gjoks, duke e plagosur për vdekje.
Pasi i mbijetoi shumë situatave të rrezikshme në tre fronte të ndryshme në Luftën e Dytë Botërore, ishte ironik fundi i saj në hotelin Kensington. E lindur në maj 1908 si Maria Christina Janina Skarbek, ajo ishte e bija e një konti polak dhe, nëpërmjet nënës së saj, trashëgimtare e një familje bankare hebreje. Ajo i kaloi vitet e para të jetës duke vrapuar nëpër pronat e fshatit, një fëmijëri që do të kishte një ndikim kyç tek ajo më vonë në jetë.
"Ajo u rrit e mësuar me shumë liri dhe vëmendje, mësoi të hipte në kalë, të gjuante me pushkë gjuetie,"-thotë historiania Clara Malley, e cila është autore e "The Spy Who Loved", një biografi e Christina Grenville, emër që ajo mori pasi nisi punën si agjente. Në shtator 1939, ajo udhëtoi në Afrikën e Jugut me burrin e saj të dytë, një diplomat polak, kur dëgjuan se Gjermania naziste kishte pushtuar atdheun e tyre. Ata u kthyen menjëherë në Britaninë e Madhe. Teksa burri i saj udhëtoi për në Francë për t'u bashkuar me trupat aleate, Grenville kishte plane të tjera se si ajo mund të ndihmonte.
Grenville përshkroi një plan për të kaluar Karpatet me ski në Poloninë e pushtuar, për të marrë materialet dhe fondet e propagandës aleate atje, duke u bërë gruaja e parë e rekrutuar.
“Ajo ishte një konteshë që kishte lidhje të shumta me njerëz të ndryshëm në poste të rëndësishme”, shpjegon Malley.
Në një rast ajo mori një mikrofilm që tregonte forcat gjermane të rreshtuara përgjatë kufirit sovjetik në atë që dukej si përgatitje për një sulm. Mikrofilmi iu përcoll Winston Churchill, i cili, sipas vajzës së tij Sarah, Grenville-n e kishte agjenten e tij të preferuar. Gjermanët e kapën dy herë dhe e morën në pyetje, por ajo arriti të çlirohej dhe të shpëtonte. Në një rast, ajo i bindi rojtarët e burgut se kishte tuberkuloz duke kafshuar gjuhën e saj aq fort sa dukej sikur po kolliste gjak.
"Mjeti i saj më i madh ishte truri."
Edhe kafshët nuk mund t'i rezistonin sharmit të saj.
Në librin e saj, Malley përshkruan dy raste kur Grenville ishte në gjendje të kthente një qen roje të Patrullës Kufitare në kafshë shtëpiake që ndiqte çdo urdhër të saj. Me një zgjuarsi të shpejtë dhe guxim të pafund, Grenville ishte një mjeshtre manipulimi dhe bindjeje. Duke përdorur një megafon, ajo bindi një grup prej 63 oficerësh polakë që të sabotonin instalimet ushtarake dhe të dezertonin. Pavarësisht nga heroizmi i saj, kur lufta mbaroi, Grenville zbuloi se vendi për të cilin ajo kishte rrezikuar jetën e saj e kishte braktisur.
"Shënimi i fundit në dosjet e saj britanike në lidhje me të, është vetëm një citat që thotë: "Shërbimet e saj nuk kërkohen më."
Në fund të luftës ajo u kthye në një pastruese tualetesh. Por kishte ende dashuri. Ai ishte Dennis George Muldowney. Të dy filluan një lidhje, por ai shpejt u mërzit me Grenville. Megjithatë vazhdoi ta ngacmonte deri në mbrëmjen që e vrau në hotelin Shelburne.
“Ajo vdiq brenda pak sekondash nga sulmi; tehu i kaloi drejt e në zemrën e saj."
Muldowney u var dhjetë javë më vonë dhe, megjithëse vrasja u bë lajm, me kalimin e viteve historia e Grenville është zbehur në harresë./ZËRI
