ROMË- Matteo Messina Denaro është në koma të pakthyeshme. Burimet në spitalin L'Aquila bënë me dije për mediat italiane se Denaro, 61 vjeç, i shtruar në repartin e burgut të spitalit L'Aquila, nuk do të dalë nga koma dhe këtë mbrëmje mjekët do t'i pezullojnë ushqimin. Messina Denaro ishte në spital për më shumë se një muaj.
Operacioni në zorrë që iu nënshtrua më 8 gusht ishte i suksesshëm, por kanceri i avancuar i zorrës së trashë të mafiozit shkaktoi një përkeqësim të pakthyeshëm të gjendjes së tij shëndetësore. Superbosi i Cosa Nostra është dënuar për përfshirjen e tij në dhjetëra vrasje, duke përfshirë bombat e vitit 1992 që vranë magjistratët antimafia, Giovanni Falcone dhe Paolo Borsellino. Përveç vrasjeve të Falcone dhe Borsellino, ai është dënuar për vrasjen e Giuseppe Di Matteo, djalit 12-vjeçar të një dëshmitari, i cili u mbyt dhe u shpërbë me acid. I idolizuar prej kohësh nga mafiozët më të rinj për pamëshirshmërinë dhe karizmën e tij, Messina Denaro vulosi një reputacion për brutalitet duke vrarë një mafioz rival dhe duke e mbytur të dashurën e tij 3-muajshe shtatzënë. Madje një herë tha se mund të kishte mbushur një varrezë me ata që kishte vrarë./Zëri.ai
