MOSKË- I vetmi njeri që presidenti rus Vladimir Putin refuzoi ta përmendte me emër - i cili kurrë nuk hoqi dorë nga lufta kundër regjimit ishte Alexei Navalny. Por edhe ai vdiq sot, në moshën 47-vjeçare në burgun ku kishte shkuar për të vuajtur dënimin. I ndaluar në vitin 2018 nga kandidimi në zgjedhje, ai mbeti kundërshtari më i fuqishëm politik i Putinit.
Ai ishte njeriu i vetëm i aftë të nxirrte dhjetëra mijëra në rrugë duke bërë thirrje për një Rusi pa Putin.
Ai ishte kokëfortë, sarkastik dhe jashtëzakonisht karizmatik - një populist i lindur me një sens humori që tërhiqte veçanërisht të rinjtë.
Hetimet e tij në YouTube për miqtë e Putinit, dhe më në fund vetë presidentin, mblodhën miliona shikime dhe ekspozuan korrupsionin e rendit më të lartë. Por edhe fitoi armiq gjithnjë e më të fuqishëm. Për një dekadë, Navalny u tolerua nga Kremlini. Ai duroi një sërë arrestimesh në dukje të pafundme, paraqitje në gjykatë dhe periudha në paraburgim, por ai mbijetoi.
Në gusht 2020, kjo ndryshoi.
Si e nisi opozitari angazhimin e tij politik?
Navalny u rrit në vendbanime të ndryshme ushtarake, por u diplomua për drejtësi në Universitetin e Miqësisë Popullore në Moskë në 1998 dhe më pas për ekonomi në Universitetin Financiar në 2001. Ai iu bashkua partisë politike "Jabloko", por u përjashtua nga ajo në vitin 2007 për "veprimtari nacionaliste".
Në vitin 2004, ai themeloi lëvizjen civile 'Komiteti për Mbrojtjen e Moskovitëve', një lëvizje civile kundër korrupsionit dhe shkeljeve të të drejtave të qytetarëve. Një vit pas kësaj, ai mbështeti Lëvizjen Rinore DA! dhe ishte koordinator i projektit "Policia me Njerëzit". Në vitin 2006, ai koordinoi projektin Debatet Politike dhe ishte kryeredaktor i programit TVC. Në vitin 2008, Navalny filloi një fushatë kundër korrupsionit në kompanitë shtetërore.
Më 23 qershor 2007, ai u bë bashkëthemelues i lëvizjes 'Narod'. Një vit më pas, ai themeloi një organizatë publike, Unionin e Aksionarëve Minoritarë, e cila merret me mbrojtjen e të drejtave të investitorëve privatë dhe që punonte për problemin e rritjes së transparencës së kostove të monopolit. Në vitin 2009, ai ishte këshilltar i guvernatorit të rajonit Kirov, ish-udhëheqësit të Aleancës së Forcave të Djathta, Nikita Belihog.
Mosmarrëveshje me regjimin e Putinit
Në vitin 2010, ai hapi faqen e internetit RosPil për raportimin e korrupsionit në kontratat qeveritare, gjë që tërhoqi vëmendjen e publikut. Pjesëmarrja në protestat e vitit 2011 për shkak të parregullsive zgjedhore çoi në burgosjen e tij të parë. Pas kthimit të Putinit në presidencë në vitin 2012, Navalny ishte objektivi i goditjeve të njëpasnjëshme. Gjatë një gjyqi të motivuar politikisht në 2013, ai u dënua me 5 vite burg, por u lirua papritur për të vazhduar kandidimin e tij për kryetar bashkie të Moskës, ku fitoi një çuditërisht të lartë 27.2% të votave.
Në rrethana të çuditshme, dënimi i tij u pezullua, duke e lejuar atë të vazhdonte aktivitetet e tij politike pavarësisht ndalimit për të kandiduar për poste të zgjedhura.
Zgjedhjet presidenciale 2018
Në mesin e dhjetorit 2016, Navalny njoftoi se planifikonte të kandidonte në zgjedhjet presidenciale ruse të 2018-ës dhe menjëherë pas shpalljes së programit dhe filloi të mblidhte mbështetës. Aktiviteti i tij politik ishte nën mbikëqyrje të vazhdueshme nga administrata e Putinit, duke kulmuar me një goditje të re në vitin 2021, teksa Navalny kthehej në Rusi nga Gjermania. Atje u kurua, pasi persona ende të paidentifikuar e helmuan me novichok.
Më 27 prill, një person i panjohur i hodhi sodë kaustike në fytyrë në Moskë, si pasojë e së cilës Navalny pësoi një djegie kimike në syrin e djathtë, duke humbur pjesërisht edhe shikimin. Dhjetë ditë më vonë, ai u operua në Barcelonë. Më 30 prill, REN TV publikoi një video të sulmit, por për mungesë provash dhe identifikimin e pasuksesshëm të autorit, askush nuk mori përgjegjësi.
Kritiku më i madh i regjimit të presidentit rus Vladimir Putin, Aleksei Navalny vdiq në koloninë penale numër 3, në rrethin e Yamalo-Netets. Ai u ndje keq pas një shëtitjeje, humbi ndjenjat dhe ra në tokë. Menjëherë kanë mbërritur mjekët dhe ambulanca, por tashmë ishte tepër vonë. Autoritetet ruse kanë thënë se po hetojnë shkaqet e vdekjes. Në lidhje me vdekjen e tij, kanë reaguar liderët e vendeve perëndimore dhe organizatave të rëndësishme globale. SHBA u shpreh e tronditur për lajmin, duke shtuar se pret që gjithçka të konfirmohet. Më 9 gusht 2023, një gjykatë në Moskë e shpalli fajtor politikanin opozitar Aleksei Navalnyn, duke e dënuar 19 vite burg, me akuza, që kanë të bëjnë me ekstremizmin, për shkak të Fondacionit të tij Kundër Korrupsionit. Përpara këtij akt-gjykimi, Navalny ishte duke vuajtur një dënim me 9 vite burgim. Ai dhe avokatët e tij kishin deklaruar se akuzat ndaj liderit opozitar të Kremlinit janë të motivuara politikisht./ZËRI
