TIRANË- Politikani britanik Nigel Farage, po paketon valixhet dhe pantoflat e tij dhe po përgatitet të niset për në Shqipërinë me diell pas një shkëmbimi "mesazhesh online" me kryeministrin e Shqipërisë, Edi Rama. Të dy kanë shkëmbyer kritika të ashpra pasi kryeministri shqiptar foli për një Britani “shumë të errët” pas Brexit-it dhe politikave të saj kontraverse për emigrantët. Farage u hakmor duke i thënë Ramës të “merrte mbrapsht të gjithë kriminelët”, duke këmbëngulur se një në 50, ose edhe më shumë, janë shqiptarë. Situata vetëm sa u përshkallëzua. Rama, në një seri postimesh në X, i quajti shifrat e Farage-s “ të çmendura”, megjithatë vendosi ta godiste Farage-n me mirësi dhe ta ftonte të vizitonte Shqipërinë për të shijuar diellin, mikëpritjen. Farage përfundimisht e pranoi ftesën me kusht që të diskutonte kthimin e të burgosurve shqiptarë.
Por cili mund të jetë itinerari i pushimeve të Farage?
Farage dhe Rama u kontaktuan për të bërë nga një koment për fluturimin e britanikut në Shqipëri. Dhe duke qenë se POLITICO nuk ka marrë një përgjigje deri në momentin e publikimit, media vendosi që të bënte një itinerar që politikani ta kishte, për çdo rast.
Vizita tek bunkerët: Shqipëria është shtëpia e deri në 700,000 bunkerëve prej betoni të ndërtuar gjatë regjimit totalitar komunist të diktatorit Enver Hoxha. Ato kishin për qëllim mbrojtjen kundër çdo pushtuesi të mundshëm, diçka që mund ta frymëzonte Farage në përpjekjen e tij për të shmangur një “ pushtim ” të emigrantëve nga përtej Kanalit Anglez.
Takoni disa burrnesha: Farage ka qenë i zëshëm në kritikat e tij ndaj axhendës dhe planeve të tij për të ndaluar "ideologjinë transgjinore", kështu që ndoshta një takim me disa burrnesha mund të përbëjë interes për të. Burrneshat janë gra që, për të marrë përsipër përgjegjësitë e një babai që i ka ndërruar jetë ose të një kryefamiljari mashkull, bëjnë një betim beqarie dhe përqafojnë veshjen, sjelljen dhe sjelljen mashkullore. Ndërsa janë të pakësuara në numër dhe kanë mbetur vetëm 3 të tilla në Shqipëri dhe nuk kanë asnjë kanë lidhje të ngushtë me komunitetin LGBTQ+, sërish mund të jenë një "takim" me vlerë për të.
Pi raki: Pasi i acaroi bullgarët me një retorikë të ngjashme kundër emigrantëve potencialë, Farage bëri një udhëtim në vend në vitin 2013. Ai u filmua duke shijuar një gotë verë dhe sharmin e disa muzikantëve dhe valltarëve vendas. Farage mund të tundohet të zëvendësojë birrën me pak raki, një pije alkoolike të fuqishme të bërë nga rrushi ose kumbullat.
Vizitoni Selinë Botërore Bektashiane: I akuzuar më parë për përhapjen e retorikës anti-muslimane, Farage mund të zgjerojë horizontet e tij me një udhëtim në Selinë Botërore Bektashiane në Tiranë, shtëpia e një sekti të moderuar të Islamit Sufi që mirëpret gratë dhe alkoolin në ritualet e tyre. Ata gjithashtu ka të ngjarë të bëhen versioni i Vatikanit në Shqipëri nëse një njoftim i vitit 2025 nga Rama për t'i shndërruar ata në një shtet sovran brenda vendit arrin që të realizohet.
Të kthehemi te rrënjët e tij: Si stërnip i një emigranti gjerman që iku në Mbretërinë e Bashkuar në kërkim të një jete më të mirë dhe bashkëshort i një gruaje gjermane, Farage mund të bëjë homazhet e tij në Varrezat e Luftës Gjermane në qendër të Tiranës. Në varësi të kohës së vizitës së tij, ai mund të jetë gjithashtu i ftuari nderi në ceremoninë e përbashkët të organizuar nga ambasadorët e Mbretërisë së Bashkuar dhe Gjermanisë. Ai gjithashtu mund të shohë një fragment të Murit të Berlinit jashtë zyrës së Ramës meqënëse do të jetë aty.
Vizitoni Teatrin e Kukullave: Farage e ka përshkruar veten si një “keqbërës të pantomimës” dhe ka thënë se kur të largohet nga politika, dëshiron të shkojë në teatër. Kështu që ai mund ta përdorë vizitën e tij në Shqipëri si një shans për të vizituar Teatrin historik të Kukullave. I restauruar me dashuri me fondet e Bashkimit Evropian pas tërmetit të vitit 2019, ky vend mund t’i kujtojë gjithashtu kohën kur e quajti Presidentin francez Emmanuel Macron një “kukull” të ish-kreut të Komisionit Evropian Jean-Claude Juncker.
Vizitoni statujën e Mbretëreshës Elizabeth II: Në qytetin verior të Hasit, ku më shumë se 80 përqind e vendasve kanë familje në Mbretërinë e Bashkuar, në qendër është ngritur një statujë e Mbretëreshës Elizabeth II. Farage mund të shkojë edhe në Kukës, një qytet tjetër me lidhje të forta me Mbretërinë e Bashkuar, ku mund të vizitojë “Costa Caffe” dhe të numërojë makinat me targa të verdha, tipike britanike. Kukësi është qyteti i parë në botë që është nominuar për një çmim Nobel për Paqen për shkak të ndihmës së dhënë rreth 400,000 refugjatëve nga Kosova gjatë luftës së viteve 1998-1999, një rrëfim empatie që mund të frymëzojë një ndryshim në zemrën e Farage.
Një filxhan kafeje: Farage iu hodh një filxhan kafeje gjatë fushatës zgjedhore të vitit 2024, por në Shqipëri mund të ketë një pritje më të ngrohtë. Ndonëse nuk janë adhurues të mëdhenj të çajit, vendasit e marrin kafenë shumë seriozisht dhe Tirana ka një nga numrat më të lartë të kafeneve për frymë në Evropë. Për më tepër, besa, kodi i nderit shqiptar i vendos mysafirët mbi Zotin dhe madje edhe familjen e tyre, ndaj është e sigurtë që incidenti ndaj tij nuk do të përsëritet.
Relaks në plazh: Sipas imazheve të gjeneruara nga inteligjenca artificiale të Ramës, pushimi në plazh është në krye të axhendës. Vija bregdetare e Shqipërisë shtrihet për rreth 276 kilometra, duke kaluar përgjatë Detit Adriatik dhe Detit Jon, dhe ofron shumë mundësi që ai të bëjë një pushim të merituar.
Tani seriozisht, kush ka të drejtë?
Në tetor 2024, gazeta Telegraph publikoi një artikull që pretendonte se 52,000 shqiptarë jetonin në Mbretërinë e Bashkuar, dhe 1,227 prej tyre ishin në burg. Këtu është referuar edhe Farange. POLITICO kontaktoi ambasadorin shqiptar në Londër, Uran Ferizi, për të kërkuar të dhënat e tyre mbi numrin e shqiptarëve në Mbretërinë e Bashkuar. Ai tha: “Ne besojmë se ka më shumë se 300,000” dhe ndau një dokument që vëren se shifrat e Telegraph përjashtojnë shqiptarët e natyralizuar, fëmijët shqiptarë të lindur në Mbretërinë e Bashkuar dhe “dhjetëra mijëra” shqiptarë me pasaporta greke dhe italiane që kanë zgjedhur të jetojnë në vendin ishullor. Sipas ambasadës, shkalla e të burgosurve shqiptarë është përafërsisht 1 në 500.
Nëse Farage pranon se faktet e tij janë të gabuara, Rama ka kërkuar që ai të jetë i pari që t'u thotë kujtdo që flet keq për shqiptarët "të mos e bëjë më"./ZËRI
Marrë nga Telegraph
