BRITANI E MADHE - Emigracioni pritet të shtojë 6.1 milionë njerëz në popullsinë e Mbretërisë së Bashkuar deri në mesin e vitit 2036, sipas parashikimeve zyrtare, që shtojnë presionin ndaj kryeministrit britanik Rishi Sunak, për një çështje të ndjeshme në prag të zgjedhjeve. Popullsia e Mbretërisë së Bashkuar do të rritet nga 67 milionë në mesin e vitit 2021 në 73.7 milionë në mesin e vitit 2036, e nxitur pothuajse tërësisht nga migrimi, parashikoi të martën Zyra për Statistikat Kombëtare (ONS).
Migrimi është bërë një çështje dominuese politike në Britani dhe do të jetë e dukshme në një votim kombëtar më vonë këtë vit, ku konservatorët në pushtet të Sunakut parashikohen në sondazhe të humbasin pushtetin. Parashikimet, gjatë periudhës 15-vjeçare, flasin për një projeksion prej 541,000 lindjesh më shumë se vdekje, tha ONS.
Shifrat e publikuara në nëntor treguan se migrimi vjetor neto në MB arriti një rekord prej 745,000 personash në 2022 dhe ka qëndruar i lartë që atëherë. Parashikimet e ONS supozojnë një nivel neto migrimi prej 315,000 njerëz në vit, që nga 2018 e tutje. Qeveria e Sunak muajin e kaluar njoftoi masa më të rrepta për viza, duke përfshirë pragjet më të larta të pagave dhe kufizimet për sjelljen e anëtarëve të familjes, për të ulur numrin e të ardhurve.
Lëvizja u kritikua nga bizneset dhe sindikatat, të cilat thanë se do të ishte kundërproduktive për sektorin privat dhe shërbimin shëndetësor të drejtuar nga shteti, të dyja të goditura nga mungesa e fuqisë punëtore.
Zyra e Brendshme përcaktoi një plan kohor për zbatimin e kufizimeve të martën, me qëllim uljen e numrit të emigrantëve me 300,000 persona, krahasuar me vitin e kaluar. Kjo zyrë tha se do të vendoste rregulla të reja më 19 shkurt për të hequr të drejtën e punonjësve të kujdesit për të sjellë persona në ngarkim, ligj që do të gjejë zbatim nga 11 marsi./Reuters - ZËRI/
