SHBA- Donald Trump i ka bërë thirrje Gjykatës së Lartë të SHBA që të ndërhyjë dhe të anulojë një vendim kundër tij në Nju Jork për paratë që i ka paguar Stormy Daniels për ta penguar atë të zbulojë marrëdhënien e tyre. Me vendimin kundër tij javën e kaluar, Trump u bë ish-presidenti i parë amerikan që u dënua për një krim. Në një postim të hënën në faqen e tij “Truth Social”, ai thekson se shpallja e dënimit, e planifikuar për më 11 korrik, është vetëm katër ditë përpara Konventës Kombëtare Republikane, ku ai pritet të zyrtarizojë emërimin e tij si kandidat presidencial.
Një juri të enjten e kaluar e shpalli ish-presidentin fajtor për të 34 akuzat për falsifikimin e dokumenteve për të fshehur marrëdhënien e tij seksuale me yllin porno Stormy Daniels. Avokatët kanë theksuar, megjithatë, se dënimi i Trump është për një krim të nivelit të ulët dhe duke qenë se ai nuk ka dënime të mëparshme, burgimi i Trump është një skenar shumë i pamundur. Ndërkohë, siç raporton Guardian, një sondazh i ABC/Ipsos zbuloi se 50% e votuesve besojnë se vendimi kundër Trump ishte i drejtë, ndërsa 27% mendojnë se ishte i gabuar.
Pothuajse gjysma e të anketuarve, 49%, mendojnë se ai duhet t'i japë fund fushatës së tij, diçka që ai ka shumë pak gjasa ta bëjë. Normat ishin edhe më të mprehta në mesin e votuesve që nuk e pëlqejnë njëlloj Trump dhe Presidentin Joe Biden. Në këtë rast, 65% e mbështetën vendimin, ndërsa dy të tretat thanë se ish-presidenti duhet të përfundojë fushatën e tij. Anketuesit parashikojnë se ky grup mund të jetë një grup kritik në grupin e votuesve që do të përcaktojë rezultatin e zgjedhjeve në nëntor./ZËRI
