Agjencia ndërkombëtare e vlerësimit të kreditit, Moody's ndryshoi perspektivën për Shqipërinë nga të 'qëndrueshm'e sot në 'pozitive' dhe konfirmoi vlerësimet “Ba3” për vendin tonë.
Sipas Moody-s, ndryshimi i perspektivës në pozitive pasqyron forcimin e pozicioneve fiskale dhe të jashtme të Shqipërisë, të cilat do të përmirësojnë kapacitetin e vendit për thithjen e goditjeve nëse ruhen. Perspektiva pozitive pasqyron gjithashtu vrullin e përshpejtuar së fundmi në zbatimin e reformave strukturore në kontekstin e procesit të pranimit të Shqipërisë në Bashkimin Evropian. Vrulli i vazhdueshëm i reformave do të mbështeste forcimin e profilit institucional të Shqipërisë, duke përfshirë efikasitetin e administratës publike, efektivitetin e politikës fiskale dhe një sundim më të fortë të ligjit.
Konfirmimi i vlerësimeve 'Ba3' të Shqipërisë pasqyron performancë të fortë rritjeje dhe nivele të moderuara të borxhit publik.
Rritja ekonomike
Agjencia parashikon që ekonomia shqiptare të rritet me 3.6% gjatë vitit 2026 dhe me 3.5% në vitin 2027. Në vlerësimin e saj, rritja ekonomike dhe deficitet e kontrolluara fiskale pritet të ndikojnë edhe në uljen graduale të borxhit publik. Moody’s parashikon që borxhi i qeverisjes së përgjithshme të zbresë nga 52.9% e PBB-së në fund të vitit 2025, në rreth 50.2% në vitin 2027.
Por, Moody’s evidenton edhe dobësitë.
Institucionet kanë filluar të forcohen në kuadër të procesit të anëtarësimit në BE, por mangësitë në sundimin e ligjit dhe kontrollin e korrupsionit vazhdojnë. Kërkesat relativisht të mëdha bruto për huamarrje dhe rreziqet e sektorit bankar që lidhen me rritjet e shpejta të çmimeve të shtëpive e ekspozojnë Shqipërinë ndaj goditjeve të mundshme të papritura./ZËRI
