Termometri shënon 52.3 gradë Celsius sot në Indi! Autoritetet paralajmërojnë valë ekstreme të nxehti

Njerëzit në radhë për të mbushur ujë

INDI- Një temperaturë rekord prej 52.3 gradë Celsius u regjistrua sot në Nju Delhi, kryeqyteti i Indisë, ku autoritetet paralajmëruan banorët për mungesë uji. Kjo temperaturë rekord u regjistrua në periferinë Mungespur të Nju Delhit, nga Departamenti Meteorologjik i Indisë, i cili foli për " valë të forta të të nxehtit ". Departamenti Meteorologjik i Indisë kishte regjistruar tashmë një rekord të lartë prej 49.9 ° Celsius dje në Nju Delhi.

Autoritetet e qytetit me rreth 30 milionë banorë kanë lëshuar për ditën e sotme ‘alarmin e kuq shëndetësor’, ku një ditë më parë janë shënuar temperaturat përkatëse. Ata paralajmëruan për "mundësinë shumë të fortë të sëmundjeve të lidhura me nxehtësinë dhe goditjes nga nxehtësia për të gjitha moshat" dhe u bënë thirrje qytetarëve që të ushtrojnë "vigjilencë të veçantë" për njerëzit që kanë probleme shëndetësore.

Sipas Departamentit Meteorologjik të Indisë, vala e të nxehtit në Indinë qendrore dhe veriperëndimore pritet "të de-përshkallëzohet gradualisht " nga nesër. Në maj të vitit 2022, në disa rrethe të kryeqytetit u regjistrua një temperaturë prej 49,2 gradë Celsius. Temperaturat shumë të nxehta janë të zakonshme në Indi gjatë verës, por ndryshimi i klimës do të sjellë valë të nxehta më të gjata, më të shpeshta dhe më intensive, sipas studiuesve. Sot në rrugët e Delhit banorët dukej se po përballeshin me situatën në mënyrë fataliste pasi nuk mund të bënin asgjë të veçantë për të shmangur vapën.

"Të gjithë duan të qëndrojnë brenda," tha Roop Ram, 57 vjeç, një shitës ushqimesh, duke thënë se ai ishte duke luftuar për të shitur donutët e tij të kripur.

"Unë nuk e di se çfarë mund të bëjmë tjetër," tha Rani, 60 vjeçe, e cila udhëton dy orë me autobus çdo mëngjes për t'i shitur turistëve në tezgën e saj të bizhuterive.

“Është padyshim shumë më nxehtë, por nuk mund të bëjmë asgjë”, tha ajo, duke pirë ujë nga një shishe që kishte sjellë me vete.

Autoritetet në Nju Delhi kanë paralajmëruar për rrezikun e mungesës së ujit. Tashmë në disa zona ka pasur ndërprerje të furnizimit me ujë. Ministri i Ujërave Atisi Marlena i bëri thirrje "përgjegjësisë kolektive" të banorëve të qytetit për të ndaluar shpërdorimin e ujit, raportoi sot Times of India./ZËRI

Në përputhje me standarded JTI