TIRANË-Shqipëria do të hapë sërish platformën Tik Tok. Ka qenë vetë kryeministri Edi Rama i cili ka deklaruar për Politico, se Shqipëria nuk do ta zgjasë ndalimin 1-vjeçar të platformës TikTok, pas asaj që ai e cilësoi si bashkëpunim konstruktiv me drejtuesit e rrjetit social.
Mbyllja e platformës u njoftua nga kryeministri Edi Rama në 21 dhjetor, pas një konsultimi publik. Shkak i nismës u bë vrasja e 14-vjeçarit Martin Cani, pasi një grup nxënësish u përfshinë në sherr me thika pranë shkollës ‘Fan Noli’ në Tiranë më 18 nëntor 2024. Por a u ndalua dhuna në shkolla?
Kreu i qeverisë shprehet se ndalimi i TikTok ka qenë efektiv në ndërtimin e marrëdhënies me platformën dhe në sjelljen e disa masave mbrojtëse që nuk ekzistonin. Ndërkohë Shqipëria nuk do të mbështesë kufizimet në përdorimin e mediave sociale nga të miturit, një temë që aktualisht është në diskutim në kryeqytete të ndryshme të BE-së dhe në Bruksel. Rama u shpreh se kjo gjë nuk do të funksionojë.
ARTIKULLI I POLITICO:
Shqipëria nuk do ta zgjasë ndalimin njëvjeçar të TikTok, tha kryeministri Edi Rama për POLITICO të mërkurën, ndërsa vlerësoi platformën për bashkëpunimin e saj.
Rama tha se pas takimeve konstruktive me platformën e mediave sociale, “jemi të kënaqur me rezultatin. E kemi bërë partneritetin dhe shpresoj që në javët ose muajt në vijim do t’ia zbulojmë planin popullit shqiptar, siç e premtuam”.
Rama tha se ishte “shumë i befasuar” nga reagimi i TikTok pas vendimit fillestar të Shqipërisë për të ndaluar platformën.
“Sepse në fillim, për shkak se ishte normale të mendonim se ata do të na luftonin, ata do të hakmerreshin ndaj nesh, do të na ngacmonin. I takova vetë dhe mbeta shumë i impresionuar nga qëndrimi i tyre. Ata po i dëgjonin me shumë kujdes pikat tona”, tha Rama për POLITICO në margjinat e Samitit BE-Ballkani Perëndimor.
Vendi kandidat për në BE vendosi ndalimin në mars të vitit 2025 pas rreth një viti bisedimesh me TikTok mbi abuzimin online, përfshirë dy vetëvrasje që besohet se lidhen me ngacmimin në platformë. Goditja fatale me thikë e një djali 14-vjeçar jashtë një shkolle, pas një mosmarrëveshjeje online, ishte pika e fundit dhe qeveria urdhëroi ofruesit e shërbimeve të internetit të bllokojnë aksesin në versionet e desktopit dhe të aplikacioneve.
Megjithatë, ky veprim shkaktoi reagime të ashpra nga partitë opozitare dhe OJQ-të, të cilat akuzuan qeverinë për censurë dhe për kufizimin e shprehjes politike në internet. Agron Gjekmarkaj, një deputet shqiptar nga grupi më i madh opozitar, i tha POLITICO-s më parë këtë vit se Rama po e përdorte ndalimin përpara zgjedhjeve të majit për të dobësuar praninë e opozitës në internet.
Kur u pyet nëse ndalimi ishte efektiv në frenimin e dhunës në shkolla, Rama u përgjigj: "Ka qenë efektiv në ndërtimin e kësaj marrëdhënieje me TikTok-un dhe në sjelljen e disa masave mbrojtëse që nuk ekzistonin."
Megjithatë, raportet e mediave lokale zbulojnë se ndalimi pati pak efekt në zgjidhjen e çështjes së dhunës në shkollë ose rritjes së dhunës dixhitale.
Por, Shqipëria nuk ka gjasa të mbështesë kufizimet në përdorimin e mediave sociale nga të miturit, një temë që aktualisht është në diskutim në kryeqytete të ndryshme të BE-së dhe në Bruksel , nëse ajo anëtarësohet në union. Rama e ka vendosur vitin 2030 si objektiv për anëtarësimin në BE.“Këto janë budallallëqe.
Kjo është diçka që Shqipëria nuk do ta marrë në konsideratë. Nuk funksionon”, tha ai, duke pranuar se qeveria e tij e ka shqyrtuar, por “nëse nuk ke një zbulim të plotë se kush fshihet pas kësaj, do të jesh gjithmonë viktimë e sulmeve nga trollët dhe robotët”, tha kryeministri.
A u mbyll Tik Tok
Mbyllja e platformës u njoftua nga kryeministri Edi Rama në 21 dhjetor, pas një konsultimi publik. Shkak i nismës u bë vrasja e 14-vjeçarit Martin Cani, pasi një grup nxënësish u përfshinë në sherr me thika pranë shkollës ‘Fan Noli’ në Tiranë më 18 nëntor 2024. Sa i përket vendimit, TikTok ka deklaruar se nuk ka prova që incidentet e dhunshme të përmendura janë të lidhura drejtpërdrejt me platformën e tyre.
Autoriteti i Komunikimeve Elektronike dhe Postare kërkoi zyrtarisht mbylljen e aksesit në platformën sociale "Tik Tok" deri më datë 13 mars, por mbyllja nuk ka ndodhur ende. Për mbylljen e aplikacionit do të bllokohen IP e Tik Tok në territorin e Shqipërisë, DNS e TikTok, SNI (Server Name Indications) të Tik Tok dhe IP e kompanisë ByteDance në territorin e Shqipërisë. Gjithsesi mbyllja ende nuk ka ndoshur dhe shumica e përdoruesëve të Tik Tok, vijojnë të kenë akses në platformë./ZËRI
