TIRANË- Kreu i Partisë Demokratike, Sali Berisha zhvilloi një takim me të rinjtë në Tiranë, ku u shpreh se nëse vjen në pushtet do të rikthejë platformën “TikTok”, e cila u ndalua në vend. Berisha tha se të rinjtë janë në qendër të fushatës zgjedhore të PD-së. Ai shtoi se vendimi i parë do të jetë hapja e platfomës, e cila u godit për qëllime censure.
“Një prej vendimeve të para do të jetë hapja e Tik Tok, sepse duke mbyllur Tik Tokun ai u kthye te etërit e tij. Të nderuar zonja e zotërinj, ky person 2 metra i gjatë, me atlete që duhet piktor dhe sportist në arenën ndërkombëtare, është djali i babit të tij i cili në 10 gusht 1988, firmosi varjen e poetit disident Havzi Nela. Në atë mbledhje të presidiumit u mor ky vendim, dhe ai ishte i pari pas diktatorit që e nënshkroi këtë. Pse? Sepse ai nuk i pranonte vjershat kundër regjimit, sepse ato ishin vjersha për lirinë e fjalës. Ai kërkonte që era e ndryshimit të vinte dhe në vendin tonë, e kërkonte edhe lirinë e shprehjes.
Meqenëse fjala e tij kërcënonte pushtetin e tyre, ata e varën poetin. Megjithatë djali nuk mund të jetë përgjegjës për veprat e babait, por ai duhet të kërkojë falje për dënuar atë që ka bërë babai i tij. Edi Rama nuk e ka bërë kurrë këtë, përkundrazi ai ka thënë se; babai im ishte në anën e duhur të historisë. Pra ai ka një marrëdhënie të vështirë me të rinjtë.
Vendimi i parë do të jetë hapja e Tik Tok sepse, duke goditur këtë platformë për qëllime censure të gjithë duhet ta dinë se, çdo diktaturë fillon me censurën. Kur ti nuk e duron atë që duron kundërshtari atëherë ke një problem me veten. Edhe njëherë ju përgëzoj dhe shpreh vlerësimin e thellë për kontributin e çmuar që keni dhënë”, tha Berisha./ZËRI
