TIRANË- Argita Malltezi, vajza e ish-Kryeministrit Sali Berisha i është bashkuar protestës që po mbahet në rrugën “Mustafa Matohiti”, në mbështetje të babait të saj, i cili qëndron në “Arrest shtëpie”. Gjatë fjalës së saj për mediat, Malltezi u shpreh se drejtësia është e kapur. Ndërsa pyetjes se a e ka takuar babain, ajo u përgjigj duke thënë se banon me të në të njëjtën shtëpi.
Argita Malltezi: Vendimi i Gjykatës është i paligjshëm, antikushtetues. Është kjo arsyeja se pse ai vendim nuk mund të qëndrojë, nuk ka nevojë për një vendim tjetër, e rrëzon Kushtetuta. Për me tepër Kodi i vjetër i mëparshëm i procedurës penale ka pasur një dispozitë që përcaktonte kufizimin e komunikimeve të personit nën masë sigurie personale me publikun. Për shkak të precedentëve që vendos Gjykata Europiane për të Drejtat e Njeriut kjo u suprimua në Kodin e ri të Procedurës Penale. Gjykata ka vendosur një masë të pa mbështetur në ligj çka përbën një shkelje të Konventës Europiane të të Drejtave të Njeriut përveçëse të Kushtetues së Shqipërisë.
Pyetje: Keni besim tek Gjykata e Apelit?
Argita Malltezi: Ky është një ushtrim shumë i mirë, ne do të bëjmë apelime të vazhdueshme në mënyrë që të demostrohet para gjithë publikut dhe atyre që mund të kenë dyshime që kjo është një drejtësi e kapur. Si mund të ketë një Gjykatë që vendos pa u mbështetur në ligj leje më që bie ndesh me Kushtetutën. Ne do të vazhdojmë me këtë rrugë.
Pyetje: E keni takuar babanë tuaj?
Argita Malltezi: Sigurisht, banojmë bashkë.
Sali Berisha akuzohet për kryerjen e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim në aferën e privatizimit të ish kompleksit Partizani. Pasi Berisha nuk e respektoi masën e sigurisë "Detyrim për t’u paraqitur në policinë gjyqësore” dhe “Ndalim i daljes jashtë shtetit”, GJKKO e konvertoi masën në "Arrest shtëpie" me kërkesë të SPAK. Më herët për dosjen “Partizani” është arrestuar dhe dhëndri i tij Jamarbër Malltezi, i cili më pas u lirua nga burgu nga Gjykata e Apelit të Posaçëm dhe u la në “Arrest shtëpie”./ZËRI
