TIRANË- Temperaturat e larta përgjatë këtij muaji kanë shqetësuar shkencëtarët anëmbanë botës, të cilët kanë dhënë paralajmërime të shumta për të bërë kujdes. Nisur nga ditët e nxehta, CNN në raportin e tij të radhës ka ngritur shqetësimin për temperaturat që kanë goditur vendin tonë dhe gadishullin ballkanik.
Për shkak të temperaturave të larta, Akropoli në Greqi është mbyllur për orë të tëra. Ministria e Kulturës e Greqisë urdhëroi mbylljen e Akropolit, atraksioni më i madh kulturor i vendit, për pesë orë nga ora 12 e mesditës, duke i detyruar turistët që të vizitojnë tempullin e Parthenonit herët në mëngjes. Kryqi i Kuq gjithashtu iu shërbeu turistëve, duke shpërndarë shishe me ujë të ftohtë dhe fletushka informuese për ata që prisnin në radhë.
Shkrimi informues:
Nxehtësia ka ardhur kryesisht nga ajri i nxehtë që fryn nga Afrika, i cili sipas parashikimeve të meterologëve do të vazhdojë deri të dielën. Temperaturat pritet të arrijnë 43 gradë Celsius.
Në Itali, dy zjarrfikës vdiqën duke shuar një flakë në rajonin e Bazilikatës në jug të vendit, thanë autoritetet.
Zyrtarët shtuan Palermon, Sicilinë, në listën e 13 qyteteve italiane nën kërcënimin e nxehtësisë. Të moshuarve në qytetin e Veronës iu kërkua të qëndrojnë brenda, ndërsa u vendosën disa stacione me ujë për freskimin e qytetarëve.
Kriza klimatike, e nxitur kryesisht nga djegia e lëndëve djegëse fosile nga njerëzit, tani po luan një rol në çdo valë të nxehtë në planet, thonë shkencëtarët, duke i bërë ato më të gjata, më të shpeshta dhe më intensive.
Paralajmërimet për të nxehtin janë në çdo shtet të gadishullit Ballkanik.
Në Kroaci, autoritetet raportuan temperaturat më të larta ndonjëherë të detit Adriatik, i cili shtrihet midis vendit dhe Italisë. Temperaturat arritën gati 30 gradë Celsius në qytetin e Dubrovnikut, pika më e njohur turistike e vendit.
Në Serbi, kompania shtetërore e energjisë raportoi konsum rekord të martën për shkak të përdorimit të ajrit të kondicionuar.
Në Shqipëri, vapa bëri që qeveria të ricaktojë orarin e punës për nëpunësit civilë, duke e bërë më të lehtë për disa që të punojnë nga shtëpia.
Maqedonia e Veriut luftoi me dhjetëra zjarre. Një flakë e madhe u shtri në gati 30 kilometra. Thirrjes për ndihmë të vendit iu përgjigjën helikopterë zjarrfikës nga Serbia, Mali i Zi, Kroacia, Rumania dhe Turqia.
Vala brutale e të nxehtit që goditi Evropën Jugore deri më tani e ka kursyer Parisin, i cili do të presë Lojërat Olimpike më vonë këtë muaj. Temperaturat ishin relativisht të ftohta 22 gradë Celsius të martën, megjithëse pritej të rriteshin më vonë gjatë javës për të rënë përsëri pas fundjavës. /ZËRI/
