VARSHAVË - Kryeministri i Polonisë Mateusz Morauiecki ka urdhëruar "veprim diplomatik urgjent", pasi dy lojtarë të Legia Varshavës u arrestuan, pas disfatës së tyre në Conference League kundër ekipit të AZ Alkmaar të enjten.
Radovan Pankov dhe Josue Pesqueira u zbritën nga autobusi i ekipit nga policia holandeze, pas një sherri me forcat e sigurisë dhe mbeten në Holandë.
“Kam udhëzuar Ministrinë e Jashtme polake të ndërmarrë veprime urgjente diplomatike për të verifikuar ngjarjet”, tha Morauiecki. "Lojtarët dhe tifozët polakë duhet të trajtohen në përputhje me ligjin", tha kreu i qeverisë polake.
Presidenti i Legia-s, Dariusz Mioduski thotë se ai u godit ndërsa po përpiqej të ndërmjetësonte. Policia e Holandës raportohet se refuzoi të linte autobusin e ekipit të Legia-s të largohej nga stadiumi dhe ndaloi mesfushorin portugez Josue e mbrojtësin serb Pankov.
Policia holandeze ka konfirmuar se një 28-vjeçar nga Serbia dhe një 33-vjeçar nga Portugalia janë arrestuar pas ndeshjes me akuzën e kundërshtimit të punonjësve policorë. Pala polake i përshkroi ngjarjet pas ndeshjes si "skandaloze". Në ndeshjen e luajtur në Holandë, mes Legia Varshavë dhe AZ Alkmaar, e cila përfundoi 1:0 për holandezët, kishte tensione edhe jashtë fushës së blertë.
Legia Varshavë është një nga klubet më të mëdha në Poloni, duke qenë 15 herë kampion i vendit./Zëri.ai/
