PESHKOPI- Një kërcënim serioz ka alarmuar Policinë në Peshkopi, pasi pronari i një biznesi karburanti është kërcënuar se do t’i hidhet në erë subjekti nëse nuk paguan shumën prej 50 milionë lekësh.
Sipas informacioneve paraprake, kërcënimi ka mbërritur përmes një kutie picash, brenda së cilësh ndodhej kërkesa për pagën. Gjithashtu, sipas burmeve, brenda në kuti ndodheshin edhe disa materiale që dyshohet se mund të përbënin një pajisje artizanale të ngjashme me eksploziv.
Burime bëjnë me dije se menjëherë pas sinjalizimit kanë mbërritur forcat e policisë, të cilët, përmes kamerave të sigurisë është bërë i mundur identifikimi i autorit, i identifikuar si Zija Shulku.
Ndërkohë, policia ka rrethuar zonën dhe ka vendosur një perimetër sigurie. Lëvizja në dalje të Peshkopisë është mbajtur nën kontroll për rreth tre orë, ndërsa qarkullimi i automjeteve është devijuar.
Në kuadër të masave, mësohet se janë mbyllur edhe subjektet përreth zonës, ndërsa janë shoqëruar disa persona nga policia. Ndërkohë, po punohet për zbardhjen e plotë të rrethanave, teksa pritet edhe konfirmimi zyrtar i Policisë së Shtetit për detajet e ngjarjes dhe natyrën e materialeve të gjetura./ZËRI
