TIRANË- Një i paraburgosur ka humbur jetën në orët e para të mëngjesit të së shtunës në burgun e Shkodër, pasi pësoi një përkeqësim të papritur të gjendjes shëndetësore.
Sipas njoftimit të Drejtorisë së Përgjithshme të Burgjeve, bëhet fjalë për shtetasin me inicialet Çezarin Jaku 62-vjeç, i cili ishte i akomoduar në të njëjtën dhomë me të birin, të burgosurin me inicialet D. J.
Mësohet se i paraburgosuri është transportuar me urgjencë drejt Spitalit të Koplikut sapo gjendja e tij u rëndua, por gjatë transportit dhe pas mbërritjes në urgjencën e spitalit, u konstatua vdekja e të paraburgosurit.
Njoftimi:
Në orët e para të mëngjesit të datës 28.06.2026, në IEVP Shkodër u regjistrua një emergjencë shëndetësore. I paraburgosuri me inicialet Ç. J., i datëlindjes 10.11.1964, i cili ishte i akomoduar në të njëjtën dhomë me të birin, të burgosurin me inicialet D. J., pësoi një përkeqësim të papritur të gjendjes shëndetësore, çfarë bëri të nevojshme ndërhyrjen e menjëhershme të personelit mjekësor.
Personeli shëndetësor i institucionit i ofroi menjëherë ndihmën e parë dhe, për shkak të rëndimit të gjendjes, u vendos transportimi i tij me urgjencë drejt Spitalit të Koplikut.
Gjatë transportit, si dhe pas mbërritjes në urgjencën spitalore, stafi mjekësor kreu të gjitha procedurat e reanimimit kardiorespirator, por, pavarësisht përpjekjeve të vazhdueshme, mjekët konstatuan ndarjen e tij nga jeta.
Në përputhje me procedurat ligjore, organet kompetente janë njoftuar menjëherë dhe kanë nisur veprimet procedurale për dokumentimin e plotë të rastit dhe sqarimin e rrethanave të ngjarjes.
Drejtoria e Përgjithshme e Burgjeve shpreh ngushëllimet e sinqerta familjes së të ndjerit dhe garanton bashkëpunim të plotë me organet e drejtësisë për zbardhjen e plotë të këtij rasti.
