Tiranë- Dy persona janë arrestuar nga Policia e Tiranës, pasi mashtruan klientët e një agjencie udhëtimi. Sipas policisë në pranga kanë rënë Redi Hambari 24-vjeç dhe Kleo Kariqi 22-vjeç. Dy të rinjtë kanë përfituar 15 mijë euro nga klientët, duke iu premtuar atyre se do të siguronin paketën e udhëtimit të plotë, ku në të përfshiheshin biletat vajtje-ardhje dhe akomodimi në hotel, por ata kanë rezervuar vetëm biletën për vajtje në destinacion. Ata akuzohen për “Mashtrim” të kryer në bashkëpunim dhe “"Fshehja e të ardhurave" dhe "Mospagimi i taksave dhe tatimeve".
"Ndalohen 2 shtetas, punonjës të një agjencie turistike, pasi dyshohet se kanë përfituar rreth 15 000 euro, duke mashtruar klientët e agjencisë.
Specialistët e Sektorit për Hetimin e Krimeve Ekonomike dhe Financiare në DVP Tiranë, në vijim të punës për goditjen e krimeve ekonomike dhe financiare, kanë organizuar dhe finalizuar operacionin policor të koduar "Travel". Si rezultat i operacionit u ndaluan shtetasit:
K. K., 22 vjeç, dhe R. H., 24 vjeç, të dy banues në Tiranë, për veprat penale "Mashtrimi", kryer në bashkëpunim, "Fshehja e të ardhurave" dhe "Mospagimi i taksave dhe tatimeve", parashikuar nga nenet 143/2-25, 180 dhe 181 të K. P.
Këta shtetas dyshohet se kanë mashtruar klientë të agjencisë së udhëtimit ku ishin të punësuar, pasi iu kanë marrë atyre paratë për rezervimin e biletave për vajtje, ardhje dhe për akomodim në hotel, por kanë blerë vetëm biletën për vajtje në destinacion.
Materialet procedurale i kaluan Prokurorisë", njofton policia. /ZËRI
