TIRANË- Tre raste të veprimtarisë së paligjshme në fushën e lojërave të fatit janë goditur nga Policia e Tiranës.
Në kuadër të operacionit të koduar “Last Bet”, janë zbuluar tre lokale ku dyshohet se organizoheshin lojëra të ndryshme fati, ndërsa janë arrestuar 2 persona, 4 janë proceduar në gjendje të lirë dhe 2 të tjerë janë shpallur në kërkim.
Sipas njoftimit të Policisë, gjatë kontrolleve të kryera janë sekuestruar 3 makineta lojërash fati, një tavolinë pokeri, çipsa, letra bixhozi dhe 5 telefona celularë që dyshohet se përdoreshin për këtë veprimtari.
Njoftimi i Policisë:
Tiranë/Finalizohet operacioni i koduar “Last Bet”.
Zbulohen 3 lokale ku organizoheshin lojëra të ndryshme fati.
Sekuestrohen 3 makineta, 1 tavolinë pokeri, çipsa, letra bixhozi dhe 5 celularë, që shërbenin për këtë veprimtari.
Arrestohen 2 shtetas, procedohen ne gjendje të lirë 4 dhe shpallen në kërkim 2 shtetas.
Si rezultat i kontrolleve dhe i veprimeve hetimore të kryera nga strukturat e Drejtorisë Vendore të Policisë Tiranë, u goditën 3 raste të organizimit të kundërligjshëm të lojërave të fatit, konkretisht:
Specialistët për Hetimin e Krimeve të Komisariatit të Policisë Nr. 1 arrestuan në flagrancë shtetasi G. Zh., 22 vjeç, dhe shpallën në kërkim shtetasit M. Zh., 50 vjeç dhe A. Zh., 25 vjeç, pasi dyshohet se organizonin lojëra fati, në një ambient në rrugën “Aleks Çaçi”, që e kishin marrë me qira për këtë qëllim. Në këtë ambient u gjetën 2 makineta për lojëra fati, 1 tavolinë pokeri, çipsa dhe letra bixhozi;
Specialistët për Hetimin e Krimeve të Komisariatit të Policisë Nr. 5 arrestuan në flagrancë shtetasi G. S.(J.), 39 vjeç, pasi në lokalin me qira që administronte, në Bathore, u gjetën 1 makinetë dhe 1 celular që dyshohet se përdoreshin për lojëra fati;
Specialistët e Seksionit për Hetimin e Krimeve Kibernetike referuan materialet në Prokurori, ku nisi procedimi penal për shtetasit S. G., 21 vjeç, O. C., 19 vjeç, R. H., 27 vjeç dhe F. D., 67 vjeç, pasi gjatë kontrollit në një lokal në rrugën “Irfan Tomini”, iu gjet secilit celular që dyshohet se përdorej për organizimin e basteve sportive.
