TIRANË-Një 66-vjeçar, pronar i një hoteli në Vaqarr, është arrestuar nga Policia Kufitare e Tiranës, pasi dyshohet se kishte strehuar 7 emigrantë nga Sudani. Policia në bashkëpunim me Drejtorinë Vendore për Kufirin dhe Migracionin Tiranë raportojnë se 66-vjeçari veç qëndrimit në hotel u kishte siguruar emigrantëve edhe transportin drejt Koplikut, me qëllim kalimin e paligjshëm të kufirit drejt vendeve të Bashkimit Europian.
Konkretisht transporti i emigrantëve nga Sudani kryhej me taxi të kompanisë Lux. Policia në kuadër të operacionit “Stafeta” u vendos në ndjekje të dy taksive të cilat u ndaluan në autostradë, ku në flagrancë u kapën emigrantët ndërsa një hetim në gjendje të lirë nisi për një nga shoferët e taksisë. Gjatë aksionit u sekuestruan dy armë gjahu, njëra prej të cilave dyshohet se mbahej pa leje, fishekë të armës së gjahut, 7 celularë, 2 automjete (taksi) dhe libri i regjistrimit të klientëve të hotelit.
Në shkurt të vitit 2024, ZËRI me dokumentarin 'NARKO TAXI', evidentoi me zë dhe figurë rastet kur shoferët e kompanive të taksive veç trasportimit të klientëve shëbenin edhe si korrierët kryesorë të shpërndarjes së drogës dhe femrave. Vitet kalojnë dhe drejtuesit e taksive shpesh herë përfshihen në aksidente, duke rrezikuar jetën e qytetarëve.
Njoftimi i policisë:
Drejtoria Vendore për Kufirin dhe Migracionin Tiranë
Finalizohet operacioni policor i koduar “Stafeta”, për goditjen e një rasti të dhënies ndihmë për kalim të kundërligjshëm të kufirit, kundrejt fitimit, emigrantëve nga Vendet e Treta.
Vihet në pranga pronari i një hoteli, ku ishin strehuar 7 emigrantë nga Sudani.
Shërbimet e Seksionit të Hetimit në Drejtorinë Vendore për Kufirin dhe Migracionin Tiranë kanë finalizuar operacionin policor të koduar “Stafeta”, në kuadër të të cilit u arrestua në flagrancë, për veprat penale “Ndihma për kalim të paligjshëm të kufijve”, “Veprime që pengojnë në zbulimin e së vërtetës” dhe “Prodhimi dhe mbajtja pa leje e armëve të gjahut dhe sportive”, shtetasi P. S., 66 vjeç, banues në Tiranë.
Nga veprimet hetimore dyshohet se në hotelin në pronësi të tij, në Vaqarr, Tiranë, ky shtetas kishte strehuar disa shtetas të huaj, të cilëve iu kishte siguruar mjete transporti (taksi) dhe i kishte nisur në drejtim të Koplikut, me qëllim kalimin e kundërligjshëm të kufirit, me destinacion shtete të BE-së.
Shërbimet e Policisë Kufitare Tiranë janë vënë në ndjekje të 2 automjeteve (taksi), dhe kanë koordinuar punën dhe bashkëpunuar me shërbimet e Policisë Kufitare Shkodër. Si rezultat, janë ndaluar te dyja automjetet në të cilat udhëtonin 7 shtetas nga Sudani, të cilët u proceduan në gjendje të lirë për veprën penale “Kalimi i paligjshëm i kufirit shtetëror”.
Gjithashtu, janë referuar materialet në Prokurori, ku ka nisur procedimi në gjendje të lirë, për taksistin, shtetasin P. Gj., për veprën penale “Ndihma për kalim të paligjshëm të kufijve”.
Gjatë këtij operacioni janë sekuestruar me cilësinë e provës materiale, dy armë gjahu, njëra prej të cilave dyshohet se mbahej pa leje, fishekë të armës së gjahut, 7 celularë, 2 automjete (taksi) dhe libri i regjistrimit të klientëve të hotelit.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
