GREQI- Këngëtari i njohur grek Giorgos Mazonakis është ndarë nga jeta në moshën 54-vjeçare, pas një arresti kardiak. Mësohet se Mazonakis u transportua me ambulancë në spitalin Elpis të Athinës ku pavarësisht ndërhyrjes mjekësore, dha frymën e fundit. Shkaku i raportuar i vdekjes ishte arresti kardiak.
Lajmi për ndarjen e tij nga jeta vjen vetëm pak muaj pasi këngëtari kishte mbushur 54 vjeç. Humbja e tij shënon një tjetër tronditje për skenën muzikore greke, ku Mazonakis ishte një prej emrave më të njohur të muzikës popullore dhe moderne.
Giorgos Mazonakis lindi më 4 mars 1972 në Nikea të Pireut, ku edhe u rrit. Që në moshë të re shfaqi interes për muzikën, duke u formuar nën ndikimin e këngës popullore greke dhe interpretuesve të njohur të saj.
Në adoleshencë vendosi ta ndiqte muzikën si profesion. Hapat e parë në skenë i hodhi në klubet e natës, ndërsa në fillim të viteve ’90 nisi të tërhiqte vëmendjen e industrisë diskografike greke.
Karriera e tij mori hov gjatë viteve ’90, periudhë në të cilën Mazonakis u shndërrua gradualisht në një prej interpretuesve më të njohur të brezit të tij. Ai u dallua për stilin e veçantë muzikor, që ndërthurte elemente të traditës popullore greke me tinguj bashkëkohorë.
Gjatë një karriere që zgjati më shumë se tri dekada, Mazonakis publikoi një numër të madh këngësh dhe albumesh. Performancat në skenat muzikore të Athinës dhe koncertet e shumta e mbajtën për vite me radhë mes emrave më të njohur të industrisë muzikore greke.
Ndarja e tij e papritur nga jeta, në moshën 54-vjeçare, shënon humbjen e një prej figurave të njohura dhe të spikatura të muzikës greke./ZËRI
