AUSTRALI- Një kalimtar i rastësishëm që u filmua duke sulmuar dhe çarmatosur një sulmues gjatë një të shtëne me armë në një aktivitet festiv hebraik në Sydney të Australisë, është lavdëruar si një hero, veprimet e të cilit mund të kenë shpëtuar jetë.
Të dielën, dy të dyshuar hapën zjarr gjatë një festimi të Hanukkah në plazhin Bondi, duke vrarë të paktën 15 persona.
Pamjet e ngarkuara në mediat sociale tregojnë një kalimtar në një parking makinash duke vrapuar drejt njërit prej personave të armatosur, i cili mban një pushkë të gjatë. Kalimtari më pas e kap të dyshuarin, ia merr pushkën dhe ia drejton armën.
Agresori humbet ekuilibrin dhe duket se tërhiqet drejt një ure, ku ndodhej sulmuesi i dytë. Videoja përfundon duke treguar kalimtarin që e vendos armën në tokë, duke e mbështetur atë në një pemë.
Të hënën, kryeministri australian Anthony Albanese konfirmoi raportet e medias se Ahmed al-Ahmed, një pronar 43-vjeçar i një dyqani frutash, ishte qytetari që ndërhyri.
“Ahmed al-Ahmed ia mori armën autorit të krimit duke rrezikuar shumë veten dhe pësoi lëndime serioze si pasojë e kësaj, dhe aktualisht po i nënshtrohet një operacioni sot në spital”, u tha Albanese gazetarëve.
Një i afërm i al-Ahmed, i cili e identifikoi veten si Mustafa Asad, i tha shërbimit televiziv australian të lajmeve 7News se al-Ahmed u qëllua dy herë gjatë incidentit.
"Ai është në spital dhe ne nuk e dimë saktësisht se çfarë po ndodh brenda», tha Asadi për median. «Shpresojmë vërtet që ai të jetë mirë. Ai është një hero, 100 përqind".
Në një intervistë të veçantë me rrjetin televiziv Al Araby, Asad shpjegoi se al-Ahmed “është një shtetas australian me origjinë siriane, nga Idlibi i Sirisë, nga fshati Nayrab”.
Ai e përshkroi al-Ahmedin si dikë që nuk do të hezitonte të ndërhynte për të ndaluar vdekjen dhe vuajtjet.
Ndërsa një video e al-Ahmedit u bë virale, përdoruesit e mediave sociale vlerësuan mendimin e tij të shpejtë dhe veprimet e tij heroike.
“Një hero australian (një civil i rastësishëm) lufton me armë kundër sulmuesit dhe e çarmatos atë. Disa njerëz janë të guximshëm dhe disa të tjerë janë… çfarëdo që të jetë kjo”, tha një person në një postim në platformën X.
"Ky burrë australian shpëtoi jetë të panumërta duke ia hequr armën njërit prej terroristëve në plazhin Bondi. HERO", tha një tjetër.
Chris Minns, kryeministri i shtetit të Uellsit të Ri Jugor, ku ndodhet Sidnei, tha se ishte "skena më e pabesueshme që kam parë ndonjëherë": "Ai njeri është një hero i vërtetë dhe nuk kam asnjë dyshim se ka shumë, shumë njerëz gjallë sonte si rezultat i trimërisë së tij."/ZËRI
