ARABI- Princi i Arabisë Saudite, Alwaleed bin Khaled bin Talal al-Saud, i njohur ndërkombëtarisht si "Princi i Fjetur", ka vdekur në moshën 36-vjeçare, pas gati dy dekadash në koma. Lajmi për vdekjen e tij u njoftua të shtunën, më 19 korrik, nëpërmjet një postimi nga babai i tij, Princi Khaled bin Talal al-Saud, nipi i miliarderit Alwaleed bin Talal.
"Oh, pusho në paqe, kthehu te Zoti yt, i kënaqur me Të, dhe hyr midis shërbëtorëve të drejtë, dhe hyr në Parajsën Time... Me besim të thellë në vullnetin e Allahut dhe pikëllim të madh, ne vajtojmë birin tonë të dashur,"- shkroi ai në arabisht në platformën X, duke e shoqëruar njoftimin me një foto bardhë e zi të të birit të shtrirë në shtratin e spitalit.
"Dende", siç e quante familja e tij, lindi në prill të vitit 1990 dhe ishte në Londër në vitin 2005 kur, në moshën 15 vjeç, u plagos rëndë në një aksident me makinë. Lëndime të shumta në kokë dhe gjakderdhja e brendshme e çuan në një komë të thellë, nga e cila nuk u zgjua kurrë.
Ai u transferua në një qendër mjekësore në Riad, ku kaloi 19 vitet e ardhshme. Gjatë gjithë kësaj kohe, babai i tij i qëndroi vazhdimisht pranë, duke e mbajtur gjallë me makineritë duke e shndërruar dhomën e spitalit në një vend të vazhdueshëm lutjeje, pritjeje dhe shprese. Princi Khaled shpesh ndante video dhe foto në mediat sociale që përshkruanin lëvizjet e vogla dhe delikate të të birit - një lëvizje të lehtë të gishtave ose ngritja e një dore - sinjale që priteshin me admirim nga mijëra ndjekës të tij. Në festa të tilla si Ramazani, Bajrami ose Dita Kombëtare Saudite, dhoma ishte e dekoruar sikur vetë princi të ishte i pranishëm në jetën e përditshme.
Gjatë gjithë kësaj kohe, babai i tij i qëndroi vazhdimisht pranë, duke e mbajtur gjallë me mbështetje mekanike dhe duke e shndërruar dhomën e spitalit në një vend të vazhdueshëm lutjeje, pritjeje dhe shprese. Gjatë këtyre viteve, historia e "princit të fjetur" u bë simbol i besimit dhe përkushtimit. Të ftuar të shumtë - anëtarë të familjes mbretërore, qytetarë të zakonshëm, madje edhe udhëheqës të huaj - vizituan dhomën e tij dhe u lutën përkrah Princit Khaled dhe fëmijëve të tjerë të tij.
Al-Waleed nuk e rifitoi kurrë vetëdijen e plotë, por për të atin ai mbeti gjithmonë "gjallë" dhe një fëmijë që nuk u braktis kurrë.
Vdekja e tij shënon fundin e një beteje të heshtur që zgjati gati 20 vjet dhe la një gjurmë të thellë jo vetëm në familjen e tij, por në një vend të tërë./ZËRI
