RUSI- Daria Navalny është vajza e disidentit rus Alexei Navalny, i cili vdiq të shtunën më 17 shkurt në burg në Rusinë veriore ku u ndalua si kundërshtar i qeverisë së Vladimir Putin dhe për angazhimin e tij për të luftuar korrupsionin në Rusi. Por përtej lidhjes së gjakut, ajo do të ndjekë të njëjtën betejë të babait të saj. Familja Navalny përfaqëson luftën për drejtësi, transparencë dhe liri në Rusi. Pavarësisht kërcënimeve të vazhdueshme, ata kurrë nuk kanë pushuar së luftuari për të promovuar ndryshime pozitive në vendin e tyre. Daria Navalnaya, e njohur gjithashtu si Dasha ka lindur në vitin 2001. Ajo filloi studimet për psikologji në Universitetin Stanford, Kaliforni, në vitin 2019.
Në vitin 2021, ajo pranoi çmimin Sakharov të Parlamentit Evropian në emër të babait të saj, çmimi më prestigjioz i Bashkimit Evropian për të drejtat e njeriut. Daria është bërë një ndikuese e mediave sociale dhe, si babai i saj, një aktiviste. Ajo ka marrë pjesë në intervista të shumta në të cilat ka folur për shpresat për të ardhmen e Rusisë. Daria Navalnaya ka folur disa herë për babain e saj dhe fushatat e tij kundër korrupsionit zyrtar në Rusi. Në vitin 2023, në një intervistë për CNN me gazetaren Erin Burnett, ajo tha se nuk do të ndalojë së luftuari derisa Putini të përfundojë luftën dhe të lirojë babanë e saj dhe të burgosur të tjerë politikë në vend. Në intervistën e dhënë në CNN, Daria tregoi gjithashtu se çfarë do të thoshte të rriteshe nën syrin vigjilent të qeverisë ruse.
Ajo tregoi se si ajo dhe vëllai i saj luanin duke shmangur spiunët ndërsa udhëtonin në transportin publik. Duke folur për arrestimet e babait të saj, Daria tha: “Kam folur me prindërit e mi dhe mësova se edhe nëse policia nuk na pëlqen, babai po bën gjënë e duhur. Unë kam qenë gjithmonë krenare për këtë, edhe pse me frikën për jetën e tij dhe tonën. Ai dëshiron më të mirën për vendin e tij. Ai dëshiron që unë dhe vëllai im më i vogël të kemi një të ardhme të mirë në këtë vend”.
