TIRANË- Ministri i Ekonomisë, Kulturës dhe Inovacionit, Blendi Gonxhja është përfshirë në një debat me sekretarin e Përgjithshëm të Partisë Demokratike, Flamur Noka. Goxhja i kujtoi këtij të fundit kohën kur ishte drejtor i Entit Kombëtar të Banesave, duke shtuar se vëllezërit dhe motra e Nokës kanë përfituar prej postit për të marrë banesa në Sarandë dhe Tiranë. Nga ana e tij, deputeti Noka u përgjigj ministrit duke u shprehur se motra e tij ka banesë në Sarandë, por e ka blerë vetë dhe nuk e ka përfituar nga shteti. Ndër të tjera i premtoi se në seancën e radhës plenare do të listonte bizneset që ministri kishte në emër të tij.
PJESË NGA DEBATI:
Gonxhja: Ka përfituar nga enti kombëtar i banesave dhe ka bërë pastrim parash me shitje dhe blerje. Edhe shtetësja Lule Basha ka përfituar banesë duke mos e lidhur asgjë me Sarandën veçse është e motra. Mes përfituesve është edhe Lulzim dhe Mevlan Noka, nëse janë vëllezër e zoti Noka. Edhe një shtetase belge që është bashkëshorte e një vëllai të Nokës. Këto janë përfitime nga enti kombëtar i banesave nga ata që rreken për moral. Kam të drejtë morale për integritetin e zotërisë në fjalë. Përveçse duhet të përgjigjet në mënyrë ligjore.
Noka: Po të kthej një përgjigje. Ishte në PD, pse u reshtove në çetën e hajdutëve? Po, familjarët e mi kanë apartamente në Sarandë, të blera cent me cent. Janë publike. Asnjë nuk i është dhënë nga shteti. Se përveçse hajdut, je edhe mashtrues. Gjithë Tirana të mban mend si sekser. Ti me rrogë pak vite, unë kam një jetë dhe nuk hap dot një biznes, ti ke miliarda, dhjetra biznese. Pse? Me paratë që i mori Mond Kukaleshi i Edi Ramës. Kjo është! prandaj je bashkuar tek çeta e hajdutëve.
Gonxhja: Unë nuk dua ta vazhdoj, kam përgjegjësi si person publik. Unë do lutesha që edhe ju ato që përmendët ti adresoni në institucionet përkatëse. Unë do të doja që ato që dyshoni se mund të kenë lidhje me mua, i dërgoni në organet kompetente. Nuk është e udhës që të flitet kështu në parlament. Fjala juaj është mendimi juaj por e ushtruar në një mënyrë kaq banale!
Noka: Unë nuk përmend emra familjesh, unë kam punë me hajdutin. Gjithë Tirana e di mirë që në kohën kur ishe nënkryetar bashkie u shpik 20%. Unë kam qenë para teje me rrogë, por nuk kam mundur kurrë që të përballoj kredi, jo më të bëj biznese. Meqë e ke me merak, seancën tjetër do t'i numëroj një më një sepse nuk të ndan asgjë nga Erion Veliaj./ZËRI
