TIRANË- Ka nisur në të gjithë Shqipërinë "Prania Besnike" e Partisë Socialiste, një nismë që do të zhvillohet çdo të premte, në të njëjtën orë dhe në të njëjtat ambiente, ku banorët e vendit do të vendosen përballë drejyuesve të tyre për të shprehur shqetësimet, problematikat e tyre dhe shërbimet që mungojnë në zonat ku ata banojnë.
Vetë kryeministri Edi Rama njoftoi se 'Prania Besnike' është dëgjim me radhë, ballë për ballë, pa kamera dhe paralajmëroi socialistët dhe deputetët se duhet të mbajnë shënime se 'çfarë robi i Zotit po flet'. Kërkesa është zbatuar nga të gjithë, ku edhe deputetja e PS, Sara Mila për Qarkun e Elbasanit njoftoi se përfundoi me sukses ditën e parë të nismës në fshatin Papër.
Me një bllok shënimesh në duar Mila deklaron se qytetarët kanë shprehur ankesat e tyre dhe i ka shënuar të gjitha. Por teksa shfleton bllokun, faqet e tij shihen të pastra, bosh. Megjithatë duke mbyllur bllokun deputetja shprehet se nisma nuk përfundon dhe do të vijojë me takimet me banorët.
View this post on Instagram
"Prania Besnike" u njoftua nga vetë kreu i qeverisë gjatë mbledhjes së grupit parlamentar të PS-së, duke deklaruar se kjo nismë do të shtrihet në të gjithë territorin e Republikës dhe do të bëhet gjithmonë për sa kohë ai do të jetë kryetar i Partisë Socialiste./ZËRI
