BRITANI E MADHE-Media britanike Daily Mail në një artikull të publikuar së fundmi zbulon se trafikantët shqiptarë të drogës po shesin telefona celularë të lidhur me bazën e klientëve të tyre në TikTok për më shumë se 300,000 paund. Media raporton se bandat kriminale kanë ndërtuar “linja” kaq fitimprurëse përdoruesish britanikë që blejnë drogë nëpërmjet një numri të vetëm telefoni, ku vetë pajisja mund të vlejë qindra mijëra paund.
Shqiptarët po i reklamojnë telefonat në mediat sociale te kriminelë të tjerë shqiptarë në Mbretërinë e Bashkuar, të cilët dëshirojnë të përfitojnë nga një fluks i gatshëm klientësh. Madje u ofrojnë blerësve potencialë mundësinë për të testuar telefonat para se të kryejnë transaksionin dhe këmbëngulin që celularët të jenë “të sigurt nga ndërhyrjet e zbatimit të ligjit”.
Në një llogari, të quajtur ‘Albanian Postcode’ e cila ofron një linjë telefonike me seli në Brighton dhe Hove për shitje për 300,000 £. Faqja premton se numri merr porosi deri në 900 gram kokainë çdo javë.
‘Numri është i ndezur për 24 orë që punëtorët (tregtarët e drogës) të bëjnë shpërndarjen me taksi.’ Ne mund t’ua ofrojmë këtë numër blerësve të mundshëm për një ose dy javë nëse ata paguajnë një depozitë. ‘Vetëm blerësit seriozë mund të na kontaktojnë,'-thuhet në postim.
Një tjetër, e quajtur ‘shqipepostcode1’ ose ‘Albanian Postcode1’, pretendon të ketë një telefon me bazë në Barking, në lindje të Londrës , i cili merrte midis 350 dhe 400 porosi për kokainë çdo javë.
‘Numër celulari në shitje në Barking dhe Dagenham’, thuhet në reklamë në shqip.
Një reklamë tjetër në të njëjtën llogari ofronte një telefon në shitje në Leicester për 90,000 £. Një shofer taksie shqiptar, i cili dikur punonte si trafikant droge në Birmingham, shpjegoi se ai shpërndante deri në 30 gramë kokainë në ditë në të gjithë qytetin. Burri, i cili tani është kthyer në Tiranë dhe kërkoi të mbetej anonim, tha se do të merrte një telefonatë nga ‘shefi’ që kontrollonte ‘linjën’ duke e urdhëruar t’ia linte drogën një blerësi.
"Shkoja në qendër të qytetit të Birminghamit rreth tetë herë në ditë për të shpërndarë”, tha ai.
“Klientët hipnin në makinën time, unë ngisja disa minuta dhe bëja marrëveshjen, pastaj ata dilnin. Një nga klientët e mi ishte një mjek. Ai merrte viza kokaine në makinën time, duke thënë se donte të kishte sa më shumë që të ishte e mundur sepse gruaja e tij e merrte të gjithën sapo të kthehej në shtëpi”, shprehet ai.
“Shefi im kishte një zinxhir furnizimi që shtrihej në të gjithë Holandën dhe punësonte 12 shoferë si unë në të gjithë Birminghamin. Më parë merrja 1,700 paund në javë për këtë, pa taksa, me benzinën e paguar për mua”, shprehet taksisti.
Gangsterët shqiptarë kontrabandojnë qindra miliona paund të fituara përmes aktivitetit të paligjshëm nga Britania dhe i kthejnë në vendin e tyre çdo vit, tha Agjencia Kombëtare e Krimit. Një burim nga forcat e rendit tha se bandat shqiptare tani ishin të vendosura fort duke drejtuar operacione të konsiderueshme droge në të gjithë Mbretërinë e Bashkuar – përveç Liverpulit, ku ende dominojnë bandat më tradicionale britanike.
