THUMANË-Banorët e zonës së Gramz, Shkofet, Thumanë dhe Derven kanë dalë sërish në protestë, duke kërkuar zgjidhje për gjendjen e një segmenti rrugor prej 500 metrash, i cili është kthyer në një rrezik të përditshëm për jetën e tyre.
Banorët në shenjë proteste për rreth një orë qëndruan në rrugë, duke bllokuar qarkullimin, ndërsa apeluan institucioneve për investime në rrugët e dëmtuara të Krujës, një ndër zonat më me pak investime e lënë jashtë vëmendjes së qeverisë.
“Kemi dal në protestë për një rrugë 500 metra, na u prishën makinat, na u prish çdo gjë. Ne do të dalim prap deri sa ta shtrojnë këtë copë rrugë. 500 metra rrugë janë, kalojnë kamionët e kanë prishur. Sa më shpejt të na e shtrojnë, ne këtë do dalim deri sa ta shtrojnë”, tha njëri prej protestuesve.
Banorët deklaruan se sot do të paraqesin një peticioni që i drejtohet bashkisë dhe ARRSH-s, pasi prej shumë kohësh janë pa një përgjigje. Rruga lidh akse kryesore dhe çdo vonesë mund të ketë pasoja serioze për jetën e qytetarëve./ZËRI
