MEMALIAJ- Policia ka dalë me njoftim zyrtar lidhur me ngjarjen e ndodhur në Memaliaj, ku u vra 30-vjeçari Endri Goxhaj.
Mësohet se ngjarja ka ndodhur pas një sherri, ku 29-vjeçar, Donaldo Nela ka qëlluar me armë zjarri 30-vjeçarin Endri Goxhaj.
Goxhaj ka mbetur i vdekur në vend pas të shtënave, por i plagosur me armë zjarri, në rrethana ende të paqarta ka mbetur edhe vëllai i autorit, 25-vjeçari Dali Nela.
Njoftimi i policisë:
Rreth orës 20:50, në Memaliaj, dyshohet se pas një konflikti, shtetasi D. N., 29 vjeç, ka qëlluar me armë zjarri shtetasin E. G., 30 vjeç, i cili ka humbur jetën rrugës për në spital.
I plagosur, në rrethana ende të paqarta, ka mbetur edhe vëllai i autorit të dyshuar, shtetasi D. N., 25 vjeç, jashtë rrezikut për jetën.
Autori i dyshuar, pas ngjarjes, është larguar me automjet. Shërbimet e Policisë janë vënë në ndjekje të tij.
Ndërkohë, është ngritur një grup i posaçëm hetimor, në drejtimin e Prokurorisë, për sqarimin e rrethanave dhe dokumentimin ligjor të ngjarjes.
