ITALI- Policia italiane njoftoi sot se ka ekstraduar të shumëkërkuarin shqiptar Kevin Kurti, i cili ishte arrestuar gjatë një operacioni në muajin shkurt të këtij viti në Durrës. Mediat italiane shkruajnë se ‘kumbari’ i marrëveshjeve të drogës mes grupeve kriminale të trafikut nga Napoli në Kalabri, është dorëzuar në sekret të plotë operacional nën pranga në Rinas, agjentëve të Interpol Romës.
Kurti është ndër 29 të dyshuarit e përfshirë në importimin në shkallë të gjerë të narkotikëve nga Holanda dhe Spanja në zonat më të lulëzuara të trafikut të drogës në provincën e Napolit. Trafikimi i drogës menaxhohej përmes bisedave dhe telefonave të koduar, të konsideruara fillimisht si “të paprekshëm”.
Kevin Kurti ishte shpallur në kërkim nga Italia për trafik droge. Ai u arrestua në Durrës më 6 shkurt 2024, pasi shpëtoi nga Karabinierët e Njësisë Hetimore të Napolit, ku 32 persona, pjesëtarë të dy organizatave kriminale të dedikuara në trafikun ndërkombëtar dhe shpërndarjen e drogës u arrestuan në një operacion të policisë së Napolit në Itali./ZËRI
