BREMEN- Sumeja Zumberi ka realizuar ëndrrën e saj: kur ishte vetëm 18 vjeç, hapi kafenenë e saj. Por pronarja e re tërheq vëmendjen me konceptin e saj të pazakontë: nuk lejohen burrat në lokalin e saj. “Baresha” në Bremen është e para pikë që shet akullore vetëm për femra. Kafeneja është në lagjen Gröpelingen, ku më shumë se 60 për qind e banorëve janë emigramtë të ardhur në Gjermani.
Sumeja Zumberit i lindi ideja e biznesit për shkak se kafenetë në zonën ku ajo jetonte ishin të mbipopulluara me burra. Që kur u hap 6 javë më parë, biznesi ka nxitur shumë diskutime në internet, por pronarja e re nuk është e shqetësuar.
“Jam e sigurt që gratë ndihen më rehat këtu se kudo tjetër. Sidomos ato që kanë pasur tashmë përvoja të këqija dhe nënat që ushqehen me gji ose që vijnë me fëmijë do të gjejnë një vend të sigurt. Burrat lejohen të blejnë një akullore në banak, por nuk lejohen të qëndrojnë,"-tregoi ajo për BILD.
Studentja mbështetet nga familja e saj, e cila prej 30 vitesh jeton në Gjermani.
“Ne jemi shqiptarë nga Kosova për financat dhe sigurimet kujdeset babai im, ndërsa në restorant ndihmon nëna. Salla ka hapësirë për rreth 30 gra. Kam marrë vetëm reagime pozitive nga të gjithë deri më tani,"-shtoi ajo.
Ndërsa një kliente thotë për median gjermane.
"Ndihem më mirë këtu, më rehat, e patrazuar."
Megjithatë, jo të gjithëve u pëlqen fakti që në “Baresha” nuk zënë vend meshkujt, këtë e tregojnë qartë mijëra komente që gjenden në faqen e internetit.
“Ky është një përjashtim i pastër i seksit të kundërt,”-shkruan njëri. Ndërsa një tjetër thotë: Kam një ndjenjë të keqe. Deri më tani, ne kemi jetuar në një shoqëri në të cilën burrat dhe gratë mund të shoqërohen normalisht në një kafene. Nëse tani futet ndarja gjinore, për mendimin tim është një hap në drejtimin e gabuar./ZËRI
