TIRANË- Gjykata e Apelit të Tiranës ka lënë në fuqi masën e sigurisë "arrest me burg" për Dritan Nanon. Ky i fundit akuzohet se është porositësi dhe organizatori i sulmit ndaj avokatit Sokol Mëngjesi, i cili u dhunua barbarisht më 29 gusht 2024. Apeli rrëzoi kërkesën e Dritan Nanos i cili kërkonte zëvendësimin e "arrestit në burg" në "arrest shtëpie". Mesa duket Apeli nuk e ka marrë parasysh kërkesën e dorëzuar në Gjykatën e Tiranës nga vetë Mëngjesi, i cili kërkoi edhe vetë lirimin e Nanon.
Njofimi i Gjykatës së Apelit:
Referuar raportimeve të mëparshme në media, Gjykata e Apelit të Juridiksionit të Përgjithshëm, informon sa më poshtë: Mbi bazën e materialeve të Drejtorisë Vendore të Policisë Tiranë, rezulton se në datë 29.05.2024, rreth orës 08:34, në rrugën “Pjetër Bogdani”, në zonën e ish-Bllokut në Tiranë, shtetasi me iniciale D. A, në bashkëpunim me shtetas të tjerë, në lidhje familjare midis tyre, kanë goditur me sende të forta shtetasin Sokol Mengjesi, me profesion avokat. Personi nën hetim shtetasi me iniciale D. N, ka paraqitur kërkesën me objekt: “Revokimin, zëvëndësimin e masës së sigurimit personal nga “arrest në burg”, në atë të “arrestit në shtëpi”.
Gjykata e Shkallës së Parë të Juridiksionit të Përgjithshëm Tiranë, me vendimin nr. 2188 Regj.Them, datë 25.09.2024, ka vendosur: Rrëzimin e kërkesës të palës kërkuese D. N. Çështja në apel u shqyrtua mbi bazën e ankimit të paraqitur, nga personi nën hetim me iniciale D. N, i cili kërkoi zëvendësimin e masës së sigurimit personal nga “arrest në burg”, në atë të “arrest në shtëpi”. Në përfundim të gjykimit, sot më datë 22.10.2024, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtare znj. Valbona Vata, vendosi: - Lënien në fuqi të vendimit nr. 2188 Regj.Them, datë 25.09.2024 të Gjykatës së Shkallës së Parë të Juridiksionit të Përgjithshëm Tiranë.
Mëngjesi u dhunua në 29 Maj, dhe kaloi disa javë në gjendje të rëndë për jetën në spital, por duket se pas përmirësimit shëndetësor, tashmë kërkon që të shuajë edhe konfliktin me Nanon. Dritan Nano dhe Dorian Alia, të cilët u vunë në pranga pas sulmit ndaj Mëngjesit, janë lënë nën masën e sigurisë arrest me burg deri në përfundimin e hetimeve. Për dhunën ndaj avokatit Mëngjesi, vijojnë të jenë në kërkim tre autorët e tjerë, Drivald Alia, Romario Tabaku dhe Elton Kasaj, teksa policia ka vënë 20 mijë euro shpërblim për këdo që jep informacion për arrestimin e tyre./ZËRI
