TIRANË- Policia ka identifikuar dhe shpallur në kërkim autorin e plagosjes së 29-vjeçarit, Mikel Xhetani në Kamëz. Raportohet se në kërkim është shpallur 23-vjeçari Emanuel Buci.
Njoftimi i policisë:
Falë veprimeve të shpejta profesionale dhe hetimore, Policia identifikon dhe shpall në kërkim autorin e dyshuar të plagosjes me armë zjarri, të 29-vjeçarit, ngjarje e ndodhur ditën e djeshme në Kamëz.
Menjëherë pas njoftimit të marrë rreth orës 13:55, ditën e djeshme, në Kamëz, se një shtetas ishte plagosur me armë zjarri shërbimet e Policisë, kanë shkuar menjeherë në vendngjarje.
Si rezultat e një pune të mirëorganizuar, të kryer nga Sektori për Hetimin e Krimeve të Rënda në bashkëpunim me Komisariatin Nr. 5, nën drejtimin e Prokurorisë, u bë i mundur identifikimi i autorit të dyshuar shtetasit E. B., 23 vjeç, i cili dyshohet se për motive të dobëta, ka plagosur me armë zjarri, shtetasin M. Xh., 29 vjeç.
Shërbimet e Policisë vijojnë ende kontrollet në të gjithë zonën me qëllim lokalizimin, kapjen dhe vënia në pranga të autorit dhe dokumentimin e plotë ligjor të ngjarjes.
Materialet procedurale iu referuan Prokurorisë së Tiranës, për veprime të mëtejshme.
Ngjarja ka ndodhur rreth orës 13:55 një ditë më parë (28 mars) në Kamëz, kur Mikel Xhetani u konfliktua me Emanuel Bucin në afërsi të një banke për një vend parkimi. Ky i fundit gjatë konfliktit ka plagosur me armë zjarri në këmbë Xhetanin. 29-vjeçari ndodhet në spital, ndërsa Policia është vënë në lëvizje për kapjen e autorit të plagosjes./ZËRI
