TIRANË- Biznesmeni Luftar Hysa bashkë me tre vëllezërit e tij, Arben, Ramiz, Fatos dhe Fabjon Hysa, emrat e të cilëve kanë qarkulluar në mediat meksikane si të lidhur me kartelin e drogës "Sinaloa", janë sanksionuar nga SHBA-ja. Në media, ata citohen si emra të fuqishëm që zotërojnë disa kazino dhe biznese në fushën e Turizmit, ndërsa janë vënë shpesh në qendër të akuzave se pastrojnë paratë e kartelit famëkeq.
Prej vitesh, biznesmeni shqiptar ka figuruar në media të ndryshme, jo vetëm ato të shtetit latin, në lidhje me krimin e organizuar dhe pastronte para për llogari të kartelit meksikan të drogës, Sinaloa, ndërsa vetë Hysa ka mohuar çdo lidhje me kartelin famëkeq të drogës.
Cilat janë bizneset e tij fitimprurëse? Në vitin 2004, ai u bë përfaqësues zyrtar i një kompanie meksikane aktive në fushën e argëtimit dhe filloi të rrisë qëndrimet e tij në Meksikë, sipas një dosjeje biznesi që ai vetë depozitoi në Gjykatën Federale të Kanadasë. Bizneset e tij kanë rezultuar të jenë të suksesshme, përveç aktiviteteve të tij në Meksikë, Kanada dhe Shqipëri, ai është bashkëpronar i një kazinoje në Belize, një vend i vogël fqinj me Meksikën.
Luftar Hysa rezulton i përfshirë përmes kompanisë "Valona Konstruksion" dhe në bashkëpunim me Besnik Luka, që kanë ngritur kazino në Vlorë, me transferime parash të dyshimta dhe me rrjet të lojëra të fatit jashtë Shqipërisë. Valona Konstruksion është një kompani e themeluar në vitin 2002 me pronar biznesmenin Besnik Lulaj. Kjo kompani përfiton tendera publikë në Shqipëri dhe zotëron licenca kazinoje në Shqipëri.
Lidhja e Luftar Hysa me "Marina Bay": Luftar Hysa cilësohet prej kohësh në media si ortak i Besnik Lulaj, pronari i resortit luksoz “Marina Bay” në Vlorë. Ky resort është përmendur në mediat meksikane se është i lidhur me Kartelin e Sinaolas në Meksikë. Vetëm pak kohë më parë bëri bujë lajmi se një media meksikane e quajtur “El Universal”, botoi një artikull në të cilin pronarët e “Marina Bay akuzoheshin” si të lidhur me kartelin famëkeq të drogës, Sinaloa në Meksikë.
Aleanca me "El Mayo"
Zoti Hysa, një biznesmen i lindur në Shqipëri, u bë kryefjalë e mediave në Meksikë në shtator 2022 për shkak të lidhjeve të tij të dyshuara me krimin e organizuar, dy gazeta, El Universal, më pas Milenio, cituan burime nga shërbimet federale meksikane të sigurisë se ai hyri në një marrëveshje për të pastruar paratë për kartelin Sinaloa.
El Universal pretendon se sipas shërbimeve të inteligjencës qeveritare, marrëveshja është bërë mes familjes Hysa dhe Ismael Zambada Garcia, i njohur ndryshe si "El Mayo", kreu i një fraksioni të kartelit, me qëllim riinvestimin e fitimeve të trafikut të drogës në ekonominë legale, nëpërmjet projekteve të pasurive të paluajtshme ose turistike.
Çfarë raportonte mediat meksikane "El Universal"
Në shtator, EL UNIVERSAL publikoi se autoritetet e inteligjencës zbuluan se Ismael Zambada García, El Mayo, ishte lidhur me biznesmenë në aktivitete të dyshuara të paligjshme në Meksikë dhe Shqipëri.
Autoritetet e inteligjencës meksikane kanë zbuluar se kreu i një fraksioni të kartelit Sinaloa, Ismael Zambada García, i njohur si El Mayo, është i lidhur me mafian shqiptare. Sipas artikullit të 'El Universal', ky personazh ka krijuar lidhje të ngushta me vëllezërit shqiptarë Luftar, Arben, Fatos dhe Ramiz Hysa.
Ky grup kriminal shqiptar është vënë në shënjestër të autoriteteve për aktivitet të parregullt të regjistruar në sektorët e turizmit dhe kazinove në Meksikë dhe Shqipëri. Sipas burimeve të ‘El Universal’, katër shqiptarët zotërojnë një rrjet kazinosh dhe biznesesh në Sonora, Baja California dhe Quintana Roo.
Miliona dollarë pastrohen atje nga krimi i organizuar. Përveç kësaj, ata investojnë shuma të mëdha parash në Shqipëri për t'i pastruar ato. Investimet janë përqendruar në aktivitetet e lojërave të fatit dhe në fushën e turizmit.
Në artikull sqarohet se shqiptarët po kryejnë një operacion në emër të kartelit Sinaloa për të transferuar miliona dollarë në vendin e tyre nëpërmjet kompanive që kanë. Kjo lidhje është një mundësi për meksikanët që të zgjerohen në Shqipëri, një vend i vogël ish-komunist që po joshet nga paratë e aktiviteteve të paligjshme.
Departamenti i Thesarit i SHBA-së dhe Rrjeti i Zbatimit të Krimeve Financiare (FinCEN), në koordinim me Qeverinë e Meksikës, kanë sanksionuar sot Grupin e Krimit të Organizuar Hysa dhe një seri kompanish të lidhura me lojërat e fatit në Meksikë për pastrim parash dhe lidhje me kartelin e drogës Sinaloa. Grupi i Krimit të Organizuar Hysa (HOCG) përfshin anëtarët e familjes Hysa: Luftar, Arben, Ramiz, Fatos dhe Fabjon.
Sanksionet që shënjestrojnë grupin "Hysa":
Grupi i Krimit të Organizuar Hysa (HOCG), i cili përfshin anëtarët e familjes Luftar Hysa ( Luftar ), Arben Hysa ( Arben ), Ramiz Hysa ( Ramiz ), Fatos Hysa ( Fatos ) dhe Fabjon Hysa ( Fabjon ), ka përdorur ndikimin e tij përmes investimeve ose kontrollit mbi biznese të ndryshme me seli në Meksikë - duke përfshirë lokalet e lojërave të fatit dhe restorantet - për të pastruar të ardhurat nga trafikimi i narkotikëve. Besohet se HOCG vepron me pëlqimin e Kartelit Sinaloa, i cili mban kontroll kriminal mbi pjesën më të madhe të territorit ku grupi kryen aktivitetet e tij.
Luftari, me bazë midis Meksikës dhe Kanadasë, shihet shpesh në mediat publike si një anëtar kryesor i familjes Hysa, duke dhënë intervista publike mbi bizneset e familjes së tij në Meksikë dhe Evropë. Luftari, Fatosi, Arbeni dhe Fabjoni kanë punuar ngushtë me një person amerikan për të pastruar para, duke përfshirë lëvizjen e parave të gatshme në masë nga Meksika në Shtetet e Bashkuara, ku kompania e personit amerikan është përdorur për të pastruar fondet. Luftari dhe Arbeni kanë përdorur një entitet me bazë në Evropë për t'u pasuruar nga pastrimi i fondeve të paligjshme që u përkasin të dyshuarve për trafik narkotikësh. Luftari gjithashtu zotëron ose drejton disa kompani të përdorura nga HOCG.
Arbeni zotëron ose drejton disa kompani të përdorura nga HOCG në Meksikë. Arbeni është përfshirë gjithashtu në kontrabandën e parave të gatshme në masë në Shtetet e Bashkuara për qëllime pastrimi parash, si dhe në përdorimin e lokaleve të lojërave të fatit dhe restoranteve luksoze në Meksikë për të pastruar paratë e drogës.
Ramizi është përfshirë në përdorimin e lokaleve të lojërave të fatit dhe restoranteve luksoze në Meksikë si fasada për pastrimin e të ardhurave nga shitja e narkotikëve.
Fatosi, së bashku me Luftarin, Arbenin dhe Fabjonin, ishte i përfshirë në kontrabandën e parave të gatshme në Shtetet e Bashkuara me qëllim pastrimin e parave. Fatosi dhe Fabjoni ishin gjithashtu të përfshirë në përdorimin e një subjekti me seli në Evropë për t'u pasuruar nga pastrimi i fondeve të paligjshme që u përkisnin të dyshuarve për trafik narkotikësh.
Me veprimin e sotëm, OFAC po synon gjithashtu disa individë dhe subjekte brenda rrjetit të HOCG-së. Entretenimiento Palmero, SA de CV , me seli në Meksikë, në pronësi të Arbenit, është qendrore për operacionet e HOCG-së. Shtetasi meksikan Gilberto Lopez Lopez vepron si komisioner i saj. Shtetasja shqiptare, por me seli në Meksikë, Eselda Baku (më parë Eselda Hysa), vajza e Ramizit, është pjesë e Bordit të Drejtorëve./ZËRI
