VLORË- Kjo është e shtuna e gjashtë radhazi që qytetarët e Vlorës protestojnë kundër ndërtimit të muzeut hebraik në qendrën historike të qytetit. Protestuesit kërkojnë ndalimin e punimeve, ndërsa përplasja për projektin pritet të marrë një drejtim të ri pas padisë së depozituar në gjykatë.
View this post on Instagram
Gjatë protestës së kësaj të shtune qytetarët shprehën kundërshtimin e tyre ndaj projektit, duke ngritur shqetësime për ruajtjen e historisë dhe trashëgimisë kulturore të Vlorës. Ata drejtuan akuza ndaj qeverisë, ndërsa grupi nismëtar bëri të ditur se ka depozituar një padi për shkelje të pretenduara ligjore gjatë realizimit të projektit.
Sipas organizatorëve, javën e ardhshme pritet një vendim paraprak për kërkesën e tyre për pezullimin e punimeve.
Protesta u shoqërua me tensione në përfundim, kur disa pjesëmarrës kërkuan rrëzimin e gardhit që rrethon kantierin. Përpjekja nuk u realizua, ndërsa policia ndërhyri për të parandaluar përshkallëzimin e situatës.
Në përfundim të tubimit organizatorët paralajmëruan mundësinë e zhvillimit të një proteste kombëtare të shtunën e ardhshme, me synimin për të zgjeruar kundërshtimin ndaj projektit përtej qytetit të Vlorës./ZËRI
