TIRANË- Shqipëria po përballet ditët e fundit me situatë të vështirë në disa akse rrugore, ku shembjet e dherave dhe dëmtimet e infrastrukturës kanë krijuar rreziqe për qarkullimin. Nga jugu në veri, 20 segmente rrugore janë identifikuar si problematike, duke ngritur shqetësim për sigurinë e udhëtarëve. Disa prej akseve, ku rruga ka pësuar çarje, rrëshqitje ose bllokime të pjesshme, janë të bllokuara plotësisht edhe për qarkullimin e këmbësorëve.
Autoritetet dhe ARRSH (Autoriteti Rrugor Shqiptar) po vijojnë monitorimin e situatës dhe ndërhyrjet për stabilizimin e segmenteve të dëmtuara. Megjithatë, prej disa ditësh tashmë, situata mbetet kritike në segmentin Librazhd-Prrenjas për shkak të shembjes masive të rrugës në zonën e njohur si “Arrat e Gurrës”, duke shkaktuar izolim total të juglindjes së vendit.
Banorët e zonave të prekura kanë mbetur të bllokuar, ndërsa transporti i furnizimeve dhe shërbimeve të emergjencës ka pësuar vështirësi të konsiderueshme.
Janë shembur, çarë ose rrezik për qarkullimin rrugët (nga jugu në veri):
1. Kuç-Qeparo
2. Dhërmi
3. Tuneli i Llogarasë
4. Buzë tunelit të Skërficës, Kardhiq
5. Vlorë
6. Vllahinë-Poçem
7. Ura e Selenicës
8. Korçë-Ersekë
9. Dardhë-Boboshticë
10. Qukës-Qafë Plloçë
11. Librazhd-Prrenjas
12. Auto-moto-parku Elbasan
13. Vorë
14. Zall Herr
15. Skarpata në Rrugën e Arbrit
16. Derjan-Macukull (Mat)
17. Unaza e Burrelit
18. Tuneli i Murrizit
19. Lurë-Peshkopi
20. Shëngjin-Velipojë
Sa i përket gjendjes kritike në aksin Librazhd-Prrenjas, kreu i ARRSH-së, Ami Kozeli njoftoi dje në një konferecë për mediat, ndërtimin e një rruge të re provizore në shtratin e Lumit Shkumbin. Megjithatë, Kozeli nuk ka dhënë një afat kohor se sa do të zgjasë ndërtimi i rrugës së re. Ai theksoi se fenomeni ka ndodhur si pasojë e marrjes së inerteve në lumin Shkumbin.
Ndërkohë, autoritetet pritet të vijojnë monitorimin dhe ndërhyrjet për stabilizimin e akseve të dëmtuara, me qëllim rikthimin e qarkullimit normal dhe garantimin e sigurisë për të gjithë përdoruesit e rrugës./ZËRI
