FUSHË-KRUJË-Drejtoria e Burgjeve ka dalë me njoftim për shpërthimin me lëndë plasëse në ambientet e IEVP Fushë-Krujë mbrëmjen e shuar rreth orës 21:00. Në njoftim thuhet se në momentin që forcat e policisë kanë shkuar në vendngjarje konstatuan një gropë në tokë pranë zonës ku ndodhet gjeneratori e shkaktuar nga tritoli me nitrat.
Drejtoria e Përgjithshme e Burgjeve thekson se lënda plasëse është hedhur në zonën e rrethimit të jashtëm, pranë rrugës kryesore. Sipas DPB, kjo zonë nuk ndikon dhe nuk cenon sigurinë apo jetën brenda perimetrit të brendshëm të të dënuarve dhe të paraburgosurve
Grupi hetimor ka sekuestruar pamjet filmike të sigurisë, si edhe po mblidhen pamje edhe nga kamerat e sigurisë në rrugët përreth, për të çuar në identifikimin e autorëve.
REAGIMI:
Rreth orës 21:00 të mbrëmjes së djeshme, në ambientet e IEVP Fushë-Krujë është dëgjuar një shpërthim brenda rrethimit. Menjëherë pas ngjarjes, janë njoftuar strukturat përkatëse: Policinë e Shtetit, Shërbimin e Kontrollit të Brendshëm të Burgjeve dhe Prokurorinë.
Nga verifikimet paraprake në vendin e ngjarjes, është konstatuar një gropë në tokë pranë zonës ku ndodhet gjeneratori, duke ngritur dyshime se shpërthimi mund të jetë shkaktuar nga një sasi e dyshuar lënde plasëse. Nga shpërthimi nuk ka asnjë person të lënduar dhe nuk ka dëme materiale. Grupet hetimore ndodhen në ende në terren dhe po punojnë për zbardhjen e plotë të rrethanave të ngjarjes, si dhe për identifikimin e autorëve të mundshëm.
Nga të dhënat e deritanishme, rezulton se lënda plasëse është hedhur në zonën e rrethimit të jashtëm, pranë rrugës kryesore. Kjo zonë nuk ndikon dhe nuk cenon sigurinë apo jetën brenda perimetrit të brendshëm të të dënuarve dhe të paraburgosurve.
Pamjet filmike të sigurisë janë administruar dhe janë marrë në cilësinë e provës materiale nga grupi hetimor. Gjithashtu, po mblidhen pamje edhe nga kamerat e sigurisë në rrugët përreth, për të ndihmuar në identifikimin e autorëve.
