TIRANË-Gjykata e Posaçme ka vendosur masë sigurie ndaj kreut të Komisionit të Prokurimeve Publike Jonaid Myzyri, i cili u mor i pandehur nga SPAK. GJKKO ka pezulluar nga detyra Myzyrin, si dhe i ka caktuar masën e sigurisë detyrim paraqitje. Myzyri është duke u hetuar për “shkelje të barazisë në tendera” dhe “falsifikim dokumentesh” në një procedurë prokurimi të ARRSH-së me fond mbi 219 milionë lekë, për mirëmbajtjen e rrugës që kalon nga Rrësheni në Shpal dhe zona të tjera përreth.
Gjatë shqyrtimit të procedurës së mësipërme, Komisioni i Prokurimeve në mënyrë të paligjshme ka favorizuar bashkimin e dy operatorëve ekonomike ku pas veprimeve hetimore ka rezultuar se kanë paraqitur dokumente të falsifikuar. Më datë 24 qershor kreu i Prokurimeve Publike u mor zyrtarisht i pandehur nga SPAK.
Së bashku me Myzyrin janë edhe 10 të tjerë të marrë të pandehur nga SPAK për këtë tender:
Të pandehurit në këtë hetim janë:
Jonaid Myzyri- “Shkelje të barazisë së pjesëmarrësve në tendera”
Vilma Zhupaj- “Shkelje të barazisë së pjesëmarrësve në tendera”
Lindita Skeja- “Shkelje të barazisë së pjesëmarrësve në tendera”
Merita Zeqaj- “Shkelje të barazisë së pjesëmarrësve në tendera”
Enkelejda Bega- “Shkelje të barazisë së pjesëmarrësve në tendera”
Vladimir Hodaj- “Shkelje të barazisë së pjesëmarrësve në tendera”
Marjana Hasani-“Shkelje të barazisë së pjesëmarrësve në tendera”
Gerald Adhiaj-“Shkelje të barazisë së pjesëmarrësve në tendera”
Ardian Kaza- “Falsifikim të vulave, stampave ose formularëve
Ndoc Kulla- “Falsifikim të vulave, stampave ose formularëve
Mehdi Lala- “Falsifikim të vulave, stampave ose formularëve
Sipas njoftimit zyrtar të SPAK, procedimi penal ka si objekt tenderin me numër reference REF-65268-07-13-2020, për mirëmbajtjen me performancë të segmentit rrugor Rrëshen – Shpal – Qafë Bene – Hadroj – Ura e Repsit, i zhvilluar nga ARRSH. Dosja lidhet me prokurimin e një rruge, më datë 18 shtator 2020, me një fond limit prej 219.8 milion lekësh (pa TVSH).
NJOFTIMI I SPAK:
Me kërkesë të Prokurorisë së Posaçme kundër Korrupsionit dhe Krimit të Organizuar, Gjykata e Posaçme e Shkallës së Parë, në kuadër të procedimit penal 175/1 i vitit 2022*, me vendimin nr.61, datë 30.06.2025, ka caktuar masën e sigurisë ndaj shtetasit, Jonaid Myzyri, i cili mban detyrën e Kryetarit të Komisionit të Prokurimeve Publike, i dyshuar për kryerjen e veprës penale: “Shkelje e barazisë së pjesëmarrësve në tendera apo ankande publike”, e kryer në bashkëpunim, parashikuar nga nenet 258 dhe 25 të Kodit Penal, të cilit i është komunikuar akuza. Masa e vendosur përfshin “Pezullimin e ushtrimit të një detyre a shërbimi publik”, parashikuar nga neni 242 i Kodit të Procedurës Penale, si edhe atë të sigurimit personal me karakter shtrëngues, “Detyrimi për t’u paraqitur në policinë gjyqësore”, parashikuar nga neni 234 i Kodit të Procedurës Penale. Prokuroria e Posaçme kundër Korrupsionit dhe Krimit të Organizuar Tiranë, ka dërguar për ekzekutim vendimin, nr.61, datë 30.06.2025 të Gjykatës së Posaçme të Shkallës së Parë.
Objekti i këtij procedimi penal ka qenë procedura e prokurorimit, me nr. REF-65268-07-13-2020, “Loti V: “Mirëmbajtje rutinë me përformancë rruga Rrëshen (Ura e Fanit) – Shpal, Shpal – Q. Bene – Hadroj, Shpal – Ura e Repsit”, me fond limit 219.866.693 lekë pa tvsh, zhvilluar më datë 18.9.2020, me autoritet kontraktor Autoriteti Rrugor Shqiptar (ARRSH). Shqyrtimi i procedurës nga ana e autoritetit kontraktor ka pasur paligjshmëri, të cilat Komisioni i Prokurorimit Publik nuk i ka marrë në konsideratë.
Gjatë shqyrtimit të ankesës të procedurës së mësipërme, ky Komision, në kundërligjshmëri ka favorizuar bashkimin e operatorëve ekonomik; A.M., dhe D.-1., ku pas veprimeve hetimore ka rezultuar se kanë paraqitur dokumente të falsifikuara. Për këtë procedurë prokurimi janë marrë si të pandehur: Jonaid Myzyri, Vilma Zhupaj, Lindita Skeja, Merita Zeqaj ,Enkelejda Bega, Vladimir Hodaj , Gerald Adhiaj, dhe A.H., të dyshuar për kryerjen e veprës penale: “Shkelje e barazisë së pjesëmarrësve në tendera apo ankande publike”, kryer në bashkëpunim, parashikuar nga nenet 258 dhe 25 të Kodit Penal, si dhe shtetasit; Mehdi Lala , Ndoc Kulla, dhe Ardian Kaza , të dyshuar për kryerjen e veprës penale “Falsifikim i vulave, i stampave ose i formularëve”, parashikuar nga neni 190 i Kodit Penal.
*Sqarim: Gjithkush prezumohet i pafajshëm derisa nuk vërtetohet fajësia e tij me vendim të formës së prerë./ZËRI
